472/2022-2023
Aizawl, the 11th May 2022: Mizoram Rural Bank chuan Corporate Social Responsibility (CSR) kaltlangin hospital leh YMA hman tangkai tur bus leh ambulance a pe a. Heng an thilpek hlanna pual hian MRB office, MINECO ah inkhawm buatsaihin, Chief Minister Pu Zoramthanga chuan a hmanpui a ni. Health & Family Welfare Board Vice Chairman Dr. ZR Thiamsanga chu khualzahawm a ni.

MRB in tun tuma CSR hnuaia an thilpek chu (i) Synod Hospital, Durtlang hnenah bus, (ii) Hnahlan PHC tan Ambulance leh (iii) Sialsuk Branch YMA tan Ambulance te a ni.

Chief Minister chuan Bank te'n vantlang mipui hamthatna atana hetianga thilpek tangkai tak tak an pe thin chu lawmawm a ti a. MRB in CSR hnuaia hamthatna tan tak an lo tih tawh thin te chu lawmawm tiin, Zoram mipui tana an hnathawh tha chu chhunzawm zel turin a chah a. Sawrkar nen pawh thawhhona tha nei dun zelin, an tan sawrkar chu a inhawn reng thu a sawi bawk.

Health & Family Welfare Board Vice Chairman Dr. ZR Thiamsanga chuan pawh thu sawiin, MRB chu bank mipui tan dawr nuam tak nia a hriat thu a sawi a. Mizoram chhunga an inzarpharh tha chu mipui tan awlsamna lawmawm tak an siamthu te sawiin, a bial chhung Hnahlan PHC tana ambulance an pe chu lawmthu a sawi bawk.

He inkhawm hi Pu C. Ramdinsanga, General Manager, Network-I chuan kaihruaiin, MRB Chairman Pu V. Jaya Chandra leh Regional Manager Network-I Pu V.L. Zahawma te hnen atangin thusawi ngaihthlak a ni a. Hnahlan PHC Medical Officer leh Saitual Br. YMA aiawhte hnen atangin thusawi tawi ngaihthlak a ni bawk a. Pu Samuel L. Warbah, General Manager, Network-II chuan lawmthu sawiin hun a khar a ni.