No.884/2021-2022

Aizawl, the 9th June 2021: Vawiin khan Mizoram Rural Bank chuan Tv Lalrinsanga Tlau, WBC Youth Super Feather Weight Champion nilai leh Boxer Pu NT Lalbiakkima te chu an kalzelna tura senso phuhruk nan sum fai Rs 50,000/- ve ve an hlan a. Boxer te hian MRB promotion sum hi MRB Chairman Shri V.Jaya Chandra hnen atangin an dawng a. He hun hi Sports Minister Pu Robert Romawia Royte chuan a Office Chamber-ah a lo thleng a ni.

Sports Minister Pu Robert Romawia Royte chuan infiammite, MRB in a ngai pawimawh chu lawmawm a tih thu a sawi a. MRB chu nasa zawk hmasawn zel tura duhsakna hlanin hun lo la awm turah pawh tun aia nasa zawka an luanchhuah zel a rin thu a sawi a. MRB in a rawtna anga boxer pahnih an tanpui avangin lawmthu a sawi bawk a ni.

Thusawitu dang Pu TC Pachhunga, Vice Chairman, Sports & Youth Affair, ICT and Tourism pawhin Sports Minister remhriatna leh rawtna anga MRB ten infiammite an chawimawi chu ropui a tih thu a sawi a. Infiammite hmangai a Chief Minister leh Sports Minister te hmalaknate, remhriatna leh thahnem ngaihna te chu fakawm a tih thu a sawi bawk a ni.

He hun ah hian Pu H. Lalengmawia, Commissioner & Secretary SYS pawhin Sports Minister remhriatna leh India ram sports thuneitute nena an in hriat thatna a zara Mizoram infiammite hmasawnna te a sawi a. MRB officials te leh MIZBA hruaitute te pawh in thu an sawi bawk a ni.

He Function tawi ah hian Pu Lalsangaliana, Director SYS, Pu John Tanpuia, Secretary, MSSC, Pu R. Lalchhuanawma, Head Coach, Khelo India leh MRB lam atangin Pu Samuel Warbah, Genral Manager, Pi Lalchhanhimi, Chief Manager bakah Pu V. Lalrinmawia, Officer(CS) te an tel bawk a ni.