Vawiin khan pawngsual leh mipat hmeichhiatna kaihhnawiha pawikhawihna (sexually abused) tuartu naupangte tanpui dan tur Multidimensional Psychological Trauma Assessment and Intervention for Child Sexual Abuse chungchangah nilengin training buatsaih a ni a. Training hi National Commission for Protection of Child Rights, Mizoram State Commission for Protection of Child Rights, Mizoram State Child Protection Society leh Social Welfare Department buatsaih niin Mizoram Police Director General Pu Balaji Srivastava chu khuallian a ni.

Training-ah hian All India Institute of Medical Sciences (AIIMS), New Delhi atangin Dr Rajesh Sagar, Professor, Department of Psychology leh Dr Renu Sharma, Child Psychologist ten kalkhawm te thupui thlanbik hmangin an zirtir a. National Commission for Protection of Child Rights, New Delhi atangin NCPCR Member Pi Rupa Kapoor leh Child Psychology & Sociology Senior Technical Expert Pi Shaista Khan te an lo tel bawk. Mizoram District tin atangin District Child Protection Unit Counsellor te, Child Care Institution hrang hrang atangin Counsellor leh Superintendent te bakah tlawmngai pawl aiawhte training-ah hian an tel a ni. 

DGP Pu Balaji Srivastava chuan Protection of Children from Sexual Offences Act (POCSO) Act 2012 hnuaiah Mizoram sawrkar chuan kum 2014 atanga kumin June thla thleng khan thubuai ziahluh 719 a nei a, pawikhawitute dan ang taka hremna (conviction rate) a sang hle tih sawiin Mizoram hi India ram pumah POCSO Act hnuaia conviction rate nei sang ber a ni, a ti. DGP chuan naupang laka pawikhawihtuten thiam loh an chan a, dan anga hrem an tawrh ngei theih nan police ten tan an la a, hetiang thil rapthlak tak a thlen hian police te chuan uluk taka chhui leh pawikhawihtute thiam loh chan tir (convict) an nih thuai theihna tura hma lak chu an mawhphurhna a ni a, theihtawp chhuah zel an tum thu a sawi. Naupangte case bik khawihna tur Child Friendly Police Station chu Lawngtlaiah siam a ni tawh a, Mizoram District tinah siam belh zel tum a nih thu DGP hian a sawi bawk. Mizoram chhunga tlawmngai pawlte fakin kawng tinrengah khawtlang tana chhawr nahawm, naupang humhimna kawngah pawh pawl tangkai leh thawhhlawk nia a hriat thu a sawi a ni.  

Hawnna inkhawm hi chawhma ah neih niin Mizoram State Commission for Protection of Child Rights (MSCPCR) Chairperson Pi Sangzuali Vanchhawng chuan a kaihruai a. Mizoramah POCSO hnuaia case ziahluh a tam viau nia lang chu misual hrem an nih theih nana mipuiin dan hmanga hma lak a tulzia an hriat tawh vang leh a ruka tuar ngawt ngawt lova thuneitute hnena report ngam an pun zel vang a ni, a ti a. Naupang laka pawikhawihna rapthlak tak a thlenin dan hmanga hma lak nghal vat a nih theih nan report nachang hriat zel tul a tih thu a sawi bawk. 

Programme ah hian MSCPCR member Pi K.Malsawmzuali’n kalkhawmte lawmna thu a sawi a. NCPCR Member Pi Rupa Kapoor chuan training chungchang sawi zauna hun a hmang a, Mizoram State Child Protection Society Programme Manager Pi Amy Lalrinpuii’n lawm thu sawiin hawnna inkhawm hi tihtawp a ni.