Pu John Rotluangliana, Deputy Speaker, Mizoram Legislative Assembly chuan  vawiin chawhma  dar 11:00 khan Mizoram Chakma Students Union, Aizawl Zone 7th Fresher Social, Archieve Hall, Babutlang-a neih chu khuallian niin a hmanpui a. He hunah hian Pu Nihar Khanti Chakma, Minister leh Pu Nirupam Chakma MLA te pawh an tel a ni.

Pu John Rotluangliana chuan, \"Chakma zirlaite chu kan ram pumpuiin inbiak pawhna atana kan hman ber Mizo tawng thiam tum tur leh zirna sang zawk-ah tan la a, BA mai duhtawk lo turin a chah a, Medical zirna lamah a bik taka tan an lak a tul thu sawiin Chakma area-ah te hian Doctor leh Nurse leh Health Worker te an awm rei peih thin loh avangin nangmahni ngei in awm theih nan tan la ru \" a ti. Mizoram sawrkar chuan Mizorama Minority awmte a ngaipawimawh em em a, tunah pawh hian DoNER Ministry kaltlangin Minority te tan Hostel sakna tur Vaibelchhe ruk (6 Crore) lai dah a ni, a ti

Chakma zirlaite chu neitu thinlung pu a, buaina siam zawnga khawsa lo tur leh inla hrang zawnga awm lova, ram hmasawnna tura kan tanrual a pawimawh a ni, tiin Mizoram ah hnam hrang hrang kan awm a, nangni pawh chung zingah chuan in tel a, he ram hmasawn zelna atan theihtawp chhuah tlang ang u, a ti. Sawrkar chuan thalaite hmakhaw ngaiiin Sports lamah  pawh hmasawnna turin ruahmanna a siam zel a, hengah te hian inrawlh a, in chherchhuahna atan hmang rawh  a ti awk. Chakma kalkhawmte chu an khua a an haw hunah Aizawl khawpui a mi tihdan thate chhawm lut turin a fuih a, kan ram himna hi kan zavaia kuta awm a nih avangin ram pawn lama kan chipui awmte pawh thil tha lo kan ramah an rawn seng luh loh nan tanla tlang turin a chah bawk a ni.

Pu Johna hian MCSU chu Rs. 5000/- in a tanpui a ni.