2705/2025-2026

Dated Aizawl the 17th December 2025 : Vawiin khan Planning & Programme Implementation Department Committee Room-ah Mizoram State Policy Coordination Committee (MSPCC) thutkhawm neih a ni a. He hunah hian Mizoram Flagship Programme ‘Bana Kaih Scheme’ tihchangtlunna kawngah Doordarshan Kendra (DDK) Aizawl leh Industrial Development Bank of India (IDBI) te chu MSPCC-in thawhhona thuthlung Memorandum-of-Agreement (MoA) a ziahpui a ni.

Vawiina MSPCC thutkhawmna hi Dr. KC Lalmalsawmzauva, Adviser to Chief Minister (Handholding) chuan a kaihruai a. Mizoram Sawrkar Flagship Programme Bana Kaih felfai leh tha taka a kal theihna tura rilru leh ngaihtuahna senga hna pawimawh tak thawktu MSPCC Member-te hnathawh chu ropui a tih thu a sawi a. Mizoram hmasawnna rahbi pawimawh tak a ni tih hriain theihtawp chhuah zel turin Dr. KC Lalmalsawmzauva chuan he huna kalkhawmte chu fuihna thu a chah a ni.

He hunah hian MSPCC chuan DDK Aizawl chu Bana Kaih Policy tih changtlunna leh hmalaknate tlangzarhna kawnga thawhpui atan thawhhona thuthlung Memorandum-of-Agreement(MoA) a ziahpui nghal a. He MoA hian thla thum chhung (January - March, 2026) thleng a huam dawn a ni. MSPCC hian Industrial Development Bank of India (IDBI) chu Bana Kaih Scheme hamthatna mipui tam zawk hnena a thlen theihna tura thawhpui atan MoA a ziahpui nghal bawk a ni.

MSPCC thutkhawmna vawiina neihah hian Bana Kaih Scheme hnuaia hmalakna hrang hrangte thlirho a ni a. Progress Partner atanga dilna lutte endik niin Project Proposal leh Concept Paper thehluhte zirchianna neih nghal a ni. Bana Kaih Scheme hnuaia Department hrang hrang kaltlanga Loan diltute enfiahna leh an hmachhawpte zirchianna neih niin hmalak ngai hrang hrangte a tul anga bawhzui dan tur sawihona neih nghal a ni bawk.

Bank aiawh Nodal Officer-te atangin an hmalakna Report ngaihthlak niin theihtawp lo chhuah chhunzawm zel tura sawm an ni a. Bank aṭanga Report dawn angin Bana Kaih Scheme Phase I hnuaia Loan Sanction tawh zat chu SBI kaltlangin 47, MRB kaltlangin 218 leh MCAB kaltlangin 39 a ni a. Phase II pawh kalpui mek niin Mizoram Khadi & Village Industries Board (MKVIB) hnuaiah 13 leh Sports & Youth Services (S&YS) hnuaiah 1; a vaiin 14 Approve tawh a ni. He thutkhawmah vek hian Bana Kaih Scheme hnuaia CM Special Package Grant dilna 45 pawm nghal a ni bawk.

He hunah hian MSPCC Member-te, Pu Lalmalsawma Pachuau, IRS, Secretary Planning & Programme Implementation Department leh Hand Holding Scheme atangin Pu Lalfakzuala (CEO), Pu Neng Thianlala (Dy. CEO) leh Pi Lalhriatpuii Phutin (Asst. CEO) te bakah Officials dangte an tel thei a ni.