Mizoram Secretariat Service Association chuan vawiin khan an pawl khawmpui lian vawi 7-na chu Aijal Club-ah an hmang a. DP&AR Minister Pu H.Liansailova chu Khuallian a ni.

Thu sawiin Pu Liansailova chuan sorkar inrelbawlna leh a hmalakna kawng hrang hrang ah Secretariat Service te chu sorkar kut-ke ber an nih angin neitu rilru pua sorkar an tawiawm thin avang te, kawng tinrenga sorkar fin chhuahtu leh harsatna tam tak ah puitling taka dawhtheihna an lantir thin avang te in an chungah Chief Minister hmingin lawmthu a hrilh a. Mizoram sorkar chuan mipuite hnena a intiamna tam zawk a ti hlawhtling chho mek tih sawiin Pu Liansailova chuan tun atanga kum li kum nga ah chuan Mizoram hian hma lam hun duhawm tak a nei ani, a ti a. Chumi hma hun inthlak danglam meka Mizoram a awm lai hian MSSA te chu ram tan rinawm leh taima taka thawk chhunzawm turin a ngen a. Mizoram sorkar-in mipui tana sorkar belhtlak siam tura a beihna ah MSSA te chu mipui nena indawrna kawngah te, file enkawl danah te, sorkar policy leh programme thar apiang zir chian chungchangah te nasa taka tan la turin Pu Liansailova chuan a fuih bawk a ni.

MSSA khawmpui hi an pawl President Pi B.Sairengpuii, Secretary, Tourism etc. in chawhma hunah a kaihruai a. General Secretary leh Finance Secretary report te ngaihthlak a niin an member boral te sunna hun hman a ni a. Chawhnu hun chu Pu R.T.Nghaka, Vice President in a kaihruai thung a ni.