Mizoram State Sports Council din anih atanga kum 40 tlin puala MSSC Ruby Jubilee Inter-District Hockey Tournament buatsaih chu vawiin khan Ramhlun MSSC Sports Complex-ah tan niin, hmeichhe team 6 leh mipa team 4 an tel a. Tournament hawnna inkhawm hi Parliamentary Secretary Pu Hmingdailova Khiangte, Hockey Mizoram President chuan a kaihruai a, Pu C. Laltlanthanga, MSSC Secretary chu khuallian a ni.

Hun kaihruaitu Parliamentary Secretary Pu Hmingdailova Khiangte chuan MSSC kum 40 tlin Ruby Jubilee pualin Sports discipline hrang hrangah tournament buatsaih a nih mek thu leh, kum tawp lamah a kharna pui siam a la nih tur thu a tarlang a. Hemi atana organizer-te thawhrimna chu lawmawm tiin, infiammi te tan pawh hmasawnna tha tak a thlen a beisei thu a sawi a. Khuallian Pu C. Laltlanthanga chuan Hockey Tournament chu tluang taka kalpui ni se a duh thu sawiin, Mizo player-te hi ram dang player te nen khaikhin in an thiamlohna bik tur a awmloh thu te, tumruhna leh mahni invawnna tha tak nen bei chho zel a, Asian Games, Commonwealth Games leh Olympic Games-ah te India aiawh a tel chho thei tura a duhsak thu a sawi a ni.

Vawiin Hockey Tournament hawnna inkhawmah hian Rio Olympics 2016-a India Women Hockey Team Player, Mizo nula H.Lalruatfeli chu khualzahawm niin, player te fuihna thuchah a sawi bakah player-te thu tiam (oath taking) chu a kaihruai bawk.

MSSC Ruby Jubilee Inter-District Hockey Tournament 2016 ah hian Aizawl, Champhai, Lunglei, Mamit, Kolasib leh Serchhip atang hmeichhe team tel thei in, mipa team te hi Aizawl, Lunglei, Kolasib leh Serchhip atangin an tel a. Mipa leh hmeichhe champion team-te hian Trophy bakah cheng sing 2 ve ve an dawng dawn a, runner up in cheng sing khat an dawng ang.