No.3414/2021-2022
Aizawl 15th December 2021: Vawiin khan Sports Minister Pu Robert Romawia Royte pisaah Mizoram Sorkar leh Tata Trusts tangkawpa Football zirna tur Academy 60 din chungchang leh a kaihhnawih dangte State Level Monitoring Committee-in an sawihova, Mizorama MLA Constituency 40 te chu huap kim vek nise, a rem leh tul dan azirin Constituency khatah pakhat aia tam pawh Academy hawn nise an ti.

Meeting kaihruaitu Sports Minister chuan kumin January ni 31 khan Mumbaia World Trade Centre-ah Tata Trusts CEO leh Hotu dangte nen meeting neiin Football hmanga naupangte nun leh zirnaa puih chu Mizoram Sorkar ngaih pawimawh a ni tih sawiin, MSSC-Tata Trusts Football Academy 60 chu Mizoram tuam chhuaka din ka rawt a, Tata Trusts lam pawhin a thuphungin an remti a. Covid hripui avangin a takin kan tan tlai ta deuh nain tuna bul kan tan thei tur hi a lawmawm tak zet a ni a ti.Tata Trusts lamin an sum tum tur Rs 50 lakh an ruahman fel tawh a, Mizoram Sorkar pawhin Rs 30 Lakh hu an thawh ve dawn a ni.

Sports Minister chuan Joint Venture a nih angin Sorkarin Rs 30 lakh hu tum ve ngei tha a tih thu sawiin, sorkar inhuamna hian sum tam zawk funding agencies dang atanga a hnuhchhuah ngei kan beisei a ni tiin a sawi.

Meeting-ah hian project kalpui dan turte, Coach lak dan turte leh training pek dan turte rel a ni a, January 2022 chhunga hawn ngei theih nana hmalak nise an ti. A bul tan nan Academy 60 chu kum 1 chhung atan hawn nise, naupang kum 6-13 te tan nise tiin an rel a ni.

He meeting-ah hian Mizoram Sorkar aiawhin Pu H.Lalengmawia IAS Commissioner & Secretary, Pu Lalsangliana, Director, SYS Deptt te, SAI aiawhte, MFA aiawhte leh Tata Trusts bakah Mizoram State Sports Council aiawhte an tel a ni.