No.5427/2020-2021

Aizawl, the 25th September 2020 : Vawiin khan Aijal Club, Conference Hall ah Mizoram State Sports Council (2020-2023 chhunga) Vice President leh Joint Secretary thlanna neih a ni a. Inthlanna hi Returning Officer, Dr.Lalthlamuana, Chief Informatics Officer & Joint Secretary, Department of Information & Communication Technology; Polling Officer, Dr. Zirlianngura, State Nodal Officer, NSS leh Pu Vanlalrova, Dy. Director, Sports & Youth Services te kaihhruaina in neih a ni.

Covid-19 avanga sawrkar thupek te tha taka zawm niin, inthlanna hi fimkhur taka kalpui a ni. Zing Dar 10:30 leh tlai dar 3:00 inkar ah member ten Vote an thlak a, Mizoram State Sports Council Executive Committee in a lo rel tawh angin Covid-19 avanga Home Quarantine a awm mek te leh, damlohna avanga a hmuna vote thlak theilo member, Aizawl Station a awm te tan Postal Ballot hmanga Vote thlak tir an ni bawk.

He hunah hian Mizoram State Sports Council President leh Minister, Sports and Youth Services ni bawk, Pu Robert Romawia Royte bakah member thahnem takin vote an thlak a, vote hi member awm zawng zawng ten thlak in, vote hi za ah za a tla a ni. Tlai dar 3:00 ah Vote tla te chhiar a ni a, Vice President post hi chuhtu dang an awmloh avangin Pu V. Lalzawmliana, President, Mizoram Archery Association leh 6th MSSC term a Vice President lo ni tawh chu tlinga puan ni in, Joint Secretary atan Pu. C. Lalrinzuala, Mizoram Table Tennis Association President ni lai mek chu Joint Secretary atan thlan tlin a ni.

7th Mizoram State Sports Council (2020-23) ah hian member 42 awmin, Office Bearer 5 zingah Vice President leh Joint Secretary post te hi MSSC Act, leh MSSC Rules, 2005 in a phut angin member ten an thlang a ni.