Vawiin khan mihring hmanga sumdawnna chungchanga Community Health Action Network leh Transport Department in an buatsaih MST driver leh conductor te tana ni 4 chhung awh training kharna chu Transport Department Conference Hall ah neih a ni a, he hun hi Transport Minister Pu P.C.Zoramsangliana chuan khuallian niin a hmanpui a ni.

Khuallian chuan thu sawiin Mizoram ah mihring hmanga sumdawnna chungchanga hmalak a lo ngai chho ve ta mai hi thil duhawm lo tak ni mahse loh theihloh dinhmunah hlemhletna leh sum ngainatna sual leh mihringte mawi taka min dintu Pathian zah lohna ten min hnuh luh mek si avang hian nasa zawk leh pawi zawk dinhmun a kan din hma a a invenna leh hmalakna kan lo neih a kan lo inzirtir hi kan tih makmawh a ni a, he suahsualna do let a, chu suahsualna in a tih hrehawm te tanpui leh chhawmdawl hi mitinte mawhphurhna a ni tih kan hriat thar a pawimawh hle a ni, a ti. Mihring hmanga sumdawng tute hian intih awiawm nan te leh sum leh pai tawk tarh te in mi an ruk khawm te phurh kual vel nan sawrkar motor leh bungrua te an hman thin thu sawiin transport lama thawk, a bikin bus driver leh conductor te phei chu chhim leh hmar, chhak leh thlang, Guwahati thleng thlenga englai pawha mite phur kual a kal vel reng an nih avangin harsatna lo thleng thei laka an lo intah hriam chu thil tha tak a ni thu a sawi.

He training atang hian passenger te leh an pal tlang khua ah te hetiang harsatna hi lo thleng pawh ni se hmalak dan tur an hriat theih phah anga, an tih theih loh piah lamah pawh a ti theitu Police leh hetiang lam buaipuitu NGO ah te zualko nachang an hriat phah dawn a ni, a ti.

He training kharna hi Pu Siamliana, Director, Transport department chuan kaihruaiin Jimmy Laltlanmawia, Co-ordinator, CHAN in report a pe a ni.