Vawiina Mizoram Middle School Teachers Association (MSTA) General Conference vawi 7na Vanapa Hall a neihah Education Minister Pu Lalsawta chu khuallian a ni.
Pu Lalsawta chuan zirna siam that hi sorkar ngaihpawimawh ber te zinga mi a ni a, chumi tihlawhtlingtu tur pawimawh ber chu zirtirtute an ni, a ti a. Sum leh khawvel thilte chu taksa boral ang bawka boral ve mai tur, chatuan daih engmah a awm lo a, amaherawhchu zirlaite mi puitlinga chherchhuaktu zirtirtu thate erawh chuan nakin thlenga ram leh hnamin a tangkaipui tur thil hlu an hnutchhiah a ni, a ti.
Conitinuous and Comprehensive Evaluation (CCE) hman a lo nih tak avanga zirtirtute hahzia a hriatpui thu te, tunhma zirna kalphung nen a inan tak loh em avangin fate zirna atan nu leh pate pawhin inpekna thuk zawk an neih a tul tak thu te Minister chuan a sawi a. Chutihrualian he zirna kalphung thar hian Mizo khawtlang nuna thil thlakhlelhawm tak nu leh pate leh an fate inkar a pawt hnai sawt dawn a ni, a ti a. CCE hian zirlaite thiamna thuk leh nghet zawk pea mi puitlingah a chherchhuah piah lamah nu leh paten fate chunga mawhphurhna tam zawk a pek dawn avangin Mizo khawtlang nunah bung thar min kaitir ngei a beiseiawm a ni, a ti.
Pu Lalsawta chuan Chief Minister Pu Lal Thanhawla hovin kawng hrang hranga hmasawnna hna theihtawpa an thawh mek thu sawiin zirna lamah pawh a hova an hmalakna thar hi ram leh hnam tan mel lung pawimawh tak tak vek a ni dawn a, zirna avangin khawvelah Mizo fate kan pholang dawn a ni, a ti a. Hun rei tak ata tawh hnalak chungchanga Mizo ten insawipui kan ching chu sim a tul thu sawiin dik tak leh thianghlim taka hnathawh chu an tum ber a nih thu a sawi bawk a ni.
MSTA Annual Conference hi nilenga neih niin chawhma lamah rorelna hun an hmang a. An agenda hrang hrang - selection grade a kai tur service qualified tawhte hi hlan kai an nih theih nan a rang lama tih fel sak ni rawh se, Mid day meal a cooking cost/ conversion cost leh buhfai allotment hi a hun takah tih chhuah ni tawh rawh se, Cl- VIII kan lo neih tak avanga zirtirtu indaihlohna a nasat tak em avangin Middle School-ah zirtirtu dah belh ni rawh se, Middle School zirtirtu 22 B Ed. degree la neilo ten an neih theih nan hma lak ni rawh se, Right to Education Act kan lo hman takah hian sum leh pai lama puihna leh RTE ken tel mawhphurhna hrang hrang sorkar in a tih turte ti thuai rawh se, Art/ Physical/ Health Education Instructor/ Teacher School tinah dah ni rawh se tih leh Study tour SSA bul tumin neih ni rawh se tih te chu lungrual takin an pass a ni.
