Vawiin khan MHIP General Headquarters, Mizoram State Tobacco Control Society (MSTCS) leh Food & Drugs Adminstration Wing, Health & Family Welfare Department te tangkawp chuan Gutkha Khap (Ban) leh Food Safety chungchangah Awareness Programme MHIP Aizawl City Area a Branch hrang hranga OB te an neihpui.

He Programme hi Pi B.Sangkhumi, President, MHIP General Headquarters chuan a kaihruai a. Dr. Jane R. Ralte, State Nodal Officer, MSTCS chuan Gutkha Khap (ban) chungchang sawina hun a nei a. He hunah hian Pu Lalsawma Pachuau, Deputy Drugs Controller & Deputy Food Safety Commissioner leh Pi Lalrinkimi Pachuau, Food Safety Officer, Food & Drugs Administration Wing, Health & Family Welfare Department te chuan Food Safety chungchang sawi na hun nei in, mipuite kan ei leh in ah kan fimkhur a tul zia thu an sawi bawk. He Programme ah hian Branch hrang hrang atangin kal an thahnem hle a, nasa lehzual a Gutkha khap na ah leh Food Safety lama hma la turin he programme a kal te an intiam bawk a ni.

Gutkha hi Mizoramah a hluar hle a thalai tam takin an hmang a, hei hi hriselna atana a pawi em avangin Mizoram a NGO zinga lian ber pakhat MHIP lam hian kum 2010 atangin tan la in an do nasa hle a, anni hi Gutkha khap tura sulsutu pakhat an ni. An hmalakna a zarah hian Mizoramah pawh Gutkha hrang hrangte hi a tlem phah hle tawhin a hriat a ni bawk. MHIP hmalakna hian DC te pawhin a khuahkhirhna dan hi an lo chhuah tawh thin a ni. Health & Family Welfare Department hnuaia Mizoram State Tobacco Control Society leh Food and Drugs Administration te hmalakna in Gutkha khapna (Ban) Notification hi 22.08.2012 khan tihchhuah a ni ta bawk a, hei hian thu leh awm hma chu Gutkha zawrh hi a khap bur a ni.

Gutkha tih hi Vaihlo nen in ang renga ngaih a ni a, a nicotine content a vang hian a addict theih a, tin a carcinogen content avangin cancer chi hrang hrang a thlen thei a pumpui cancer, pumpui lawng, chaw dawt cancer,heart attack, sub mucous fibrosis(ka bawr vel ah pan ang deuh,an that theih loh, a rei hnu chuan cancer ah a chang thei) te pawh a thlen thei a ni. Mizoramah ngei pawh Tiranga ei nasat avanga ka chhung cancer case hi kan nei tawh a ni. Gutkha hmuam/ei nasa ah chuan mut hun mumal loh te, concentration te nasa takin an hloh thin a ni. India ram damdawiin lian Tata Memorial Hospital-ah pawh Gutkha kaih hnawih avanga mouth cancer an tam phah thu an sawi bawk a ni.