Mizo Students’ Union (MSU) chuan Ni 6-8 November, 2013 hian N. Vanlaiphai-ah ram pum huap Zirlaite khawmpui ‘MSU General Conference’ ahmang dawn a. He General Conference a Rorel tur atana MSU General Headquarters, Regional Headquarters, District Headquarters, Headquarters, Sub-Headquarters leh Branch te bakah College leh Hnampual Zirlai Pawl atanga Conference Agenda rawn lut hrang hrangte MSU Executive Meeting chuan a thlifim a. Ngunthluk taka ngaihtuah anih hnu-ah MSU General Conference 2013, N. Vanlaiphai-a rel turin hengte hi General Conference Agenda atan pawm a ni:-
1. Zofate’n Inpumkhatna leh in unauna tha leh zualkanneih theih nan MSU in chak zawkin hma la rawh se.
2. India Constitution Scheduled Tribe Order 1950, 8th Scheduled-a Mizoram State Scheduled Tribe ( S.T) list inziak hi siamthat anih theih nana MSU hmalakna hi chak zawka bawhzui ni rawh se.
3. MBSE buatsaih Zirlaibu-a Mizo History inziak siamthat ngaite siamthat anih theih nan hmalak ni rawh se.
4. School Education Department hi Directorate pahnih Elementary leh Secondary a then hran anih theih nana MSU hmalakna kal mek hi chak zawka bawhzui ni rawh se.
5. Mizoram Education Service Rules leh Mizoram Higher Education Service Rules hi a rang thei ang bera hman anih theih nan hmalak ni rawh se.
6. 8th Scheduled a Mizo tawng dah luh anih thieh nan hmalak ni rawh se.
7. Mizoram Sorkar hnuaia hnathawk, Kum diklo a inziak lutte an kum siamthatna hun Sorkarin a ruahman theih nan MSU in hmala rawh se.
MSU General Conference-2013 hi Ni 6 zan-ah Palai lawm inkhawm hmangin tan ani anga Ni 8th November, 2013 zanah a tiak ang. MSU General Conference-ah hian Pu PL Thanga, Member Secretary. State Planning Board chu khuallian a ni anga, Pu R. Thangmawia, President ZORO chu uaptu a ni bawk ang. Conference Thupui atan ‘Zofate Inpumkhat; Mizo Zirlaite mawhphurhna’ tih a ni a, Conference chhung hian thupui sawi tura ruat bik hnen atangin Conference thupui hmanga thusawi vawi hnih (2) ngaihthlak a ni dawn bawk a ni.
MSU General Headquarters chuan MSU General Conference hmang tur hian Mizo Zirlai zawng zawng te bakah a duh apiang telturina sawm a ni. Vawiin a MSU General Executive Meeting chuan Ropuichhip atanga MSU zawm dilna chu a pawm bawk a ni.
