Vawiin hian Lawngtlai Bawrhsap Pu J. Hmingthanmawia chuan Baptist Church of Mizoram Thalai Kristian Pawl (MTKP) khawmpui lian hmanna hmun tur Central YLA Playground a tlawh a, LADC CEM PU VL Hmuaka’n a tawiawm a ni.

Pandal hmuna kal hmain Bawrhsap Pisaah MTKP khawmpui hlawhtling taka Lawngtlaiin a thlen theih nana hmalakna hrang hrang leh chung hmalaknaa mawhphurtute nen meeting neih hmasak a ni a. He hunah hian Power & Electricity Department hmalakna te, PWD lamin pandal sakna hmun panna an thawh dante, Lawngtlai khawpui panna kawngpui chei meknaa hmasawnna te ngaihthlak a ni. PHE lamin tui lakna thar (Greater Lawngtlai Water Supply) hmanga khawpui a chawm hman theih dan turte sawiho a ni a. Harsatna lutuk a awmlo a nih chuan he tuilakna thar pawh hi hman theih tura beisei a ni a, a enchhinna hun tunah hian kalpui mek a ni. Khawmpui chhunga khawtlang nun nuam tak a awm theihna tura Police lamin ruahmanna an siamte, ruihhlo laka a fihlim theihna tura hmalaknate pawh sawiho a ni bawk.

Pu J. Hmingthanmawia chuan, Mizoram huap khawmpui lian berte zinga mi thleng turkannih avangin theihtawpkanchhuah zel dawn a, tihtur tul awm apiangtekantheih chinahkantizel dawn a ni, tiin kalkhawmte a hrilh a ni.

Hemi hnu hian Pandal sak mekna hmun hi an tlawh nghala, hmalak chin tawhte thlirin leh hmalak zel dan turte sawihoin hun an hmang a ni.

Vawiina Pu J. Hmingthanmawian MTKP khawmpui hmanna hmun tur a tlawhnaah hian khawmpui Organising Committee peng hrang hrangte leh Police Department, P&E, PWD, PHE, Chanchinbumite leh sawmbik mi engemawzat an tel a ni.

MTKP Khawmpui hi thla thar February ni 18 – 21 inkarah hian neih tur a ni a, vawiin thlengin Palai kal thei tur in report hi 8000 vel an awm tawh a, Khawmpui thupuiah “Mamawh Chhanna Isua Krista” tih thu an hmang ang a, Speaker hrang hrang ten an sawi dawn a ni.