Mumbai International Film Festival 2016, Mumbaia vawiina zawh takah Mizo te film tawi siam pathum Tranquility, Misty Voyage leh The Mizo Uprising te chuan thlirtute hlut a hlawh hle.

Film Festival-ah hian Mizoram atangin Nodal Deptt. Information & Public Relations Deptt. chuan aiawh pathum Pi Lallianpuii, Dy. Director & Nodal Officer te, Pu Napoleon RZ. Thanga, Film producer leh Pu Aldrin Zosangliana, Film producer te a tir a. Anni pathum hian film an screen tehi a awmzia leh siam a nih dan te an hrilhfiah a, miten anlo hlut hle a ni. Film pahnih Tranquility leh Misty Voyage tehi kum 2014-a Aizawla Films Division , Ministry of Information & Broadcasting in Film Festival cum Workshop an buatsaih tuma siam te an ni a. The Mizo Uprising hi chu Pu Napoleon RZ Thanga siam, minute 28 film a ni. Pu Napoleon RZ Thanga hi Film Selection member a ni bawk a ni.

Tun tuma MIFF Mumbai-a neih hi Short film, Animation leh Documentary bik atan a ni a, India ram leh khawvel hmun hrang hrang atangin Film lawrkhawm tihchhuah a ni. Mizoram aiawha kal te hian Films Division thuneitute chu khunkhan taka dawr nghalin Mizorama Festival leh Workshop te rawn buatsaih leh turin an ngen nghal a. State ralmuang taka film siam kawnga talent nei tha tak takte hian training kanla mamawh a ni tiin an ngen a ni.

MIFF hi thla hmasa January 28 khan Maharashtra Chief Minister Devendra Fadnavis-in a hawng a, Union Minister of State for I & B Col. Rajyavardhan Rathore, Film siamtu lar Shyam Benegal leh MIFF Brand Ambassador Jackie Shroff ten thu an sawi a ni.