Mizoram Upa Pawl, Aizawl South -II Area Conference chu vawiin nileng khan Model Veng Presbyterian Kohhran Hall-ah neih a ni a. Home Minister Pu R. Lalzirliana chu khuallian niin bialtu MLA Col. ZS Zuala pawhin Conference hi a hmanpui a ni.

Home Minister chuan intodelhna tel lo chuan chhungkaw zahawm leh ram zahawm nih a har hle, a ti a. Hetihlai hian Mizo thangthar te dinhmun en chuan intodelh lampan aiin taihmakna leh rinawmna an tlachham ta telh telh niin a lang, a ti. Hnathawh tur pawimawh tak neih vang ni hauh silova zankhaw tairek thleng thlenga meng, tlai tak taka tho leh thin tunlai thalai te awmdan thlir hian Mizoram hmakhua tur chu a mangan thlak hle a ni tiin Pu R. Lalzirliana chuan thawhrimna tel lo chuan hlawhtlinna a awmlo tih thangthar te zirtir turin kalkhawm te a sawm a. Ram leh hnam siamtha tur chuan midang chanai ei a, mahni sahmim tihpuar tumna rilru bansan leh ram tan eng thil tha nge ka tih ve theih tih ngaihtuah chunga taihmakna leh intodelhna uar telh telh hi kan tih makmawh a ni, a ti bawk. Pu R. Lalzirliana hian a Department chan Home leh Rural Development kaltlanga an hnathawh hrang hrang te pawh tarlang nghalin lungawithlak a tih thu a sawi bawk.

Rorel inkhawm, an President Pu Zasanga kaihhruaiah hian palai 136 ten Agenda 11 an sawiho a. Chawhnu lam inkhawm hi an Vice President Pu Lalthlengliana’n a kaihruai thung. Palai mipa upa ber Pu Rochana, kum 92 leh palai hmeichhia upa ber pahnih Pi Lalchhungi leh Pi Hmingliani, kum 86 te hnenah khuallian chuan pawisa leh thuziak a pe a ni.