2553/2023-2024

Aizawl, 30.10.2023: Mizoram Legislative Assembly 2023 atana inthlanna awm tur kaihhnawih ah vawiin chawhnu khan DC Conference Hall-ah Aizawl DC Pi Nazuk Kumar, inthlanpui atana District Election Officer ni bawk chuan Mizoram Upa Pawl (MUP) hruaitute nen inkawmna hun SVEEP hmalakna in an hmang.

DC Pi Nazuk Kumar chuan kan hma lawka inthlanpui lo awm turah vote nei tawh phawt chu a tam thei ang berin vote an thlak ngei theih nan tanrual a pawimawhna leh, ECI chuan kum 60 chunglamin kimchang taka vote an thlak a ngaihpawimawh thu a sawi a. Kum upa te chu ram political history thui tak hria, mahni mit ngeia lo hmu tawh an nih avangin an vote a hlut thu a sawi a  DC chuan MUP hruaitute chu an member tam thei ang berin vote an thlak ngei theih nan hmalakpui ah a sawm a ni. DC chuan ECI in ruahmanna a siam angin kawng hrang hranga hmalak a nih thu a sawi a. Aizawl district chhungah chuan a vawikhatna atan kum 80 chunglam, vote thlak tura in atanga che chhuak tura harsatna tawk te tan in lam atanga vote lo thlak - Home Voting Facilty chu vawiin atanga neih tan a nih thu a sawi bawk.

DC chuan Home Voting atana hming pe, Electoral Roll ah an details an update loh avanga hnawl ngai thenkhat an awm thu sawiin, nakin zel atan roll update theih hun hawn a nih a bawhzui zel pawimawh a tih thu a sawi a. Taksa lama harsatna nei, Home voting dil lo emaw ti theilo an awm chuan an BLO te nen inbepawp a, a tul anga remchanna siam sak turin election office lam chu a inpeih reng thu a sawi.

Vawiina MUP hruaitute nena inkawmkhawmna hi SVEEP (Systematic Voters Education and Electoral Participation) hmalakna pakhat niin, MUP hruaitute hi SVEEP campaign atana hma an lakpuiina tur atan lawmthu sawina pek an ni bawk.

He hunah hian SVEEP Nodal leh Asst. Nodal Officer te bakah member te an tel bawk a. Kum upa lam te tana voting facility siam dan chungchangah te sawihona tha tak neih a ni bawk.