Myanmar ram a India Palai Pu Vikram Misri-an April 10 a Indo-Myanmar Border Trade Point Zokhawthar a tlawh tur lo dawn sawn dan ngaihtuahin vawiin khan Champhai DC Pu CC. Lalchhuangkima kaihhruaiin, DC Conference Hall-ah thutkhawm a ni.
Pu Vikram Misri hian helai hmun a ram pahnihte insumdawn tawnna kalpui mek dan leh India ramin helai hmun a cheibawl dante enfiah atum bakah Land Custom Station a hmasawnna ruhrel bun tawhte a tlawh dawn a. Helicopter (Chopper) hmanga Zokhawthar hi kal tura ruahmanna duan anih vangin sorkar mi pawimawhte chu April 10,2017 (Thawhtan) hian Zokhawthar a Land Custom Station-ah mawihnai taka amah lo dawng sawng turin rel a ni a.
Land Custom Station Conference Hall-ah inkawmhona neih tura tih a niin, India Palai Pu Vikram Misri-a hian helai insumdawn tawnna kaihhnawih a hriat duh aneihte hrilhhre thei turin Land Custom leh Custom Preventive Force hotute, Trade & Commerce hotute, Dan leh thupek kengkawhtute leh Zokhawthar khawtlang hruaitute chu lo in peihsa turin tih a ni bawk.
Myanmar ram a India Palai hnathawktu Pu Vikram Misri-a lo kal tur hi tih chian anih ve leh Champhai District thuneitute chu thutkhawm chawpchilh nei leh turin vawiin a thukhawm chuan thu delhkilh a siam bawk.
