Mizoramin Myanmar lawngchawlhna Sittwe port kaltlanga Bay of Bengal kan pawh theih nana Lawngtlai district atanga kawngpui siam hna, Kaladan Multi Modal Transport Project hna thawh mek leh Zorinpui Land Custom Stations hmun tlawh tura vawiina Aizawl lo thleng, Myanmar Ambassador to Indai His Excellency U Zin Yaw leh a First Secretary U Ye Minn Thein ten Chief Minister Pu Lal Thanhawla chu vawiin tlai vek khan a chenna bungalow ah hmuin, inkawmna hun tha tak an nei.

Chief Minister chuan kan thenawm Myanmar nen inlaichinna tha tak nei thin, India independence hnu a ram hrang anga awm ta kan ni a ti a. Myanmar Ambassador ngeiin kan state a rawn tlawh chu a lawmawm hle a ni a ti.Chief Minister chuan sorkar laipuiin Look East Policy a duan zulzuia Kaladan Multi Modal Transport Project pawh hi a irhchhuah a nih thu U Zin Yaw hi a hrilh a. Tunhnai maia Champhaia District Institute of Education and Training (DIET) in Myanmar Sipai Officer rual 28 te hnena saptawng zirtirna an pek thu te alo hrilh bawk a. Hei hian kan ram inkungkaihna ti tha-tu anih ngei a beisei thu a sawilang bawk a ni.

Chief Minister hian Myanmar Ambassador te hi Mizo kutchhuak thil pek a hlan bawk a. Pu Lalram Thanga, Principal Secretary to Chief Minister-in a tawiawm a ni.