1557/2025-2026

Aizawl the 7th August, 2025 : August 6, 2025 (Nilaini) khan MYC Auditorium, MINECO ah MYC, Honda India Foundation leh Visan Foundation te tangkawpin an buatsaih Project Buniyaad Hotel Management (Food & Beverages) Phase II hnuaia batch 1-na leh batch 2-na training chhuak te thlahna hun (valedictory ceremony) hman a ni a. Thla 2 chhunga training chhuak Mizo thalai mi 66 (sawmruk paruk) te hnenah Certificate hlan a ni.

He hun hi Pu V. Malrosanga, Superintendent, MYC in a hmanpui a, Visan Foundation atangin Pu Saurabh Seth, Assistant General Manager, Visan Foundation a tel bawk a ni.

Thalai training chhuak te hi heng India ram hmun hrang hranga hotel-ah te hian hna an thawk nghal dawn a ni.

1. Park Hyatt, Chennai
2. Regency Hyatt, Chennai
3. The Ritz Carlton, Pune
4. Raj Park Hotel, Chennai
5. Foodlink - Delhi, Mumbai & Ahmedabad)
6. Olive Bar & Kitchen, New Delhi
7. Hindustan Hotel, Bhubaneswar
8. Hotel Lakened, Udaipur

Project Buniyaad Phase II hi kalpui chhoh mek niin tunah hian Lunglei leh Champhai ah batch 3-na leh batch 4-na kalpui mek a ni. Aizawlah batch 5-na leh batch 6-na tur dilna hun hawn mek a ni bawk.

Hotel management training nan hian MYC chuan HONDA CSR atangin sum a hmu a, nikuma batch 5 leh kumina batch 2 atan hian Rs. 1426100 zet CSR a dawng tawh a ni.

Mizo thalai training chhuak, hotel a thawk mek leh thawk tura kal tur zinga a tam zawk hian, kum 1 leh a chanve vel an thawh hnuah cruise/lawng liana thawh zui an tum a ni.