No.7029/2020-2021
Lunglei North Bialtu MLA, MYC Chairman ni bawk Dr. Vanlalṭanpuia chuan vawiin(Thawhlehni) khan a bial chhung Ramlaitui khua a bekang eisual avanga damlo PHC Haulawng Damdawiin a enkawl mekte a tlawh.
Bialtu MLA chuan a bialchhunga bekang eisual vanga damlo engemawzat an awm tih a hriat veleh an chanchin ngaihven chu a tihtur pawimawh nia a hriat thu sawiin, Sorkar hnathawkte chu mawhphurhna hlena theihtawp chhuah zel tura sawmin, chu an theihtawp chhuahna chuan kan ram hi nasa takin hma a sawn tir ang a ti a. PHC Haulawng hi kawngpui pawimawh takin a paltlang khua a nih avangin nasa taka thuam ṭhat a ṭul zual a. Chutiang tur chuan theihtawp ka chhuah dawn a ni. Thawktute pawhin inthlahrung lo a mamawh in neihte min hrilh hre zel turin ka ngen che u tiin mipui mamawh rang taka phuhru thei sorkar nih kan tum a ni a ti bawk.
Dr. Vanlalṭanpuia hi PHC Haulawng Medical Officer Dr. Lalduhawmi leh Dr. Zothangliana te chuan lo dawngsawngin, PHC mamawh hrang hrangte an lo thlen nghal bawk.
Ramlaitui khawtlang pawh tlawh nghalin, MLA hi CMO Lunglei Office aṭangin District Health Educator Pu H Lalthangliana leh Vanlalhriatpuii Staff Nurse ten an ṭawiawm a ni.
Ramlaitui ah hian Dt.26.12.2020 khan bekang eisual vanga damlo, luak, pumna leh kawṭhalo mi 37 zet awmin mi tam zawk chu mahni in lama enkawl an ni a, a na leh ngaihtuahawm zual 6 admit an ni a. Bialtu MLA hian damdawi ṭhahnem tak bakah an lo in senso phuhrukna tur sum a hlan nghal bawk a ni.
