No.1070/2020-2020

Mizoram Youth Commission (MYC) Chairman, Lunglei North AC bialtu MLA Dr Vanlaltanpuia chuan vawiin khan Mizoram pawna tangkhang lo hawte ni 14 chhung atana khunghranna hmun Covid-19 Quarantine Facility Jawahar Navodaya Vidyalaya, Pukpui a tlawh a, Quarantine Facility viltute nen in kawmin an dinhmun leh hmalak dan te an enfiah.

JNV Pukpui ah hian Nodal Officer Lunglei SDC Pu K.Lalhlimpuia chuan lo dawngsawngin he Quarantine Facility-ah hian tun dinhmunah mi 64 an awm mek thu a sawi a, hriselna lamah harsatna nei an awmloh thu leh doctor leh police-te leh Department dangte nen tang hovin Quarantine hi tluang taka kalpui mek zel anih thu a report.

MYC Chairman Dr Vanlaltanpuia chuan Quarantine Facility-a thahnemngai taka duty te chungah lawmthu sawiin an hna chu uluk leh fimkhur taka thawk chhunzawm turin a chah a. Hmun hrang hranga Mizoram mi leh sa tangkhangte an rawn haw belh zel dawn avangin kan fimkhur zual sauh a pawimawh takzet a ni tiin Quarantine Facility viltute chu Quarantine facility-a awmte kawng engkima fimkhur tura zirtir tur leh ngun taka vil turin a chah a ni. Harsatna leh mamawh an neihte sawrkar hnenah rang taka thlen thin turin a chah bawk.

Lunglei District-ah tun dinhmunah Quarantine Facility 19 a awm mek a. Hengte hi Lunglei khawpui leh a chhehvelah pariat (8), Tlabungah pasarih (7), Marpara S ah pahnih (2) leh Bunghmun leh Lungsen ah pakhat ve ve an ni. Tin, District chhungah quarantine facility-a khunghran mek mi 144 an awm a. Hengte hi Tourist Lodge, Zotlang-ah mi 11, Mizoram Polytechnic, Hrangchalkawn ah mi 6, JNV Pukpui-ah mi 64, Tlabung New Tourist Lodge ah mi 20, Tlabung Old Tourist Lodge-ah mi 10, Trade Facilitation Centre, Tlabungah mi 24 leh Circuit House Tlabungah mi 9 an ni. Tangkhang rawn haw belh turte dawl zo tur Quarantine Facilities tur ngaihtuah mek zel a ni a, hetih lai hian rawn haw tur zat hi a danglam ve zel avangin district thuneitute chuan a tul angin ngaihtuahna an seng zel bawk a ni.