Mizo thalaite - skilled leh unskilled in Mizoram Youth Commission tangkai zawk a an chhawr theih nan nimin ni 21.10.2019 khan MYC Chairman Dr. Vanlaltanpuia leh Skill Development & Entrepreneurship Minister, Dr Mahendra Nath Pandey ten inkawmna an nei. Mizo thalai tam zawkten MYC kaltlanga eizawnna tha zawk leh ngialnghet zawk an neih theih nan hmalakna thar tur chungchang sawi dun a ni.

MYC Chairman chuan, Mizo thalai talent nei tha tak takte hian an thiamna te hmanga ei an zawn a, mahni inchawm zo tur a thalaite chherchhuah chu MYC in a ngaihpawimawh ber anih thu a hrilh a ni. Dr. Mahendra Nath Pandey hian MYC in Skill Development and Entrepreneurship hnuaia thalaite eizawnna kawng a kawhhmuh dan tur project hrang hrangte chu chak taka hma lo lakpui alo tiam a ni.

MYC Chairman chuan Ministry of Textiles, Govt. of India dawr nghal bawkin, Sanjay Rastogi, IAS, Development Commissioner, leh Dy. Development Commissioner, KC Shakdwipee ten an lo dawngsawng a, Mizo thalaite handloom leh textile lama eizawnna zau zawk leh handloom development project chak zawka thingtlang lama kalpui a nih theih nan hmalak dan turte sawiho a ni. Handloom bakah Muga silk development chungchangte pawh sawiho a ni a. Mizoram thalaite tan eizawnna zau zawk project hrang hrang, heng - music, fashion, sports, bamboo leh craft hmanga eizawnna promote hi Mizoram Youth Commission chuan chak taka hma lak a tum thu MYC Chairman chuan a hrilh a, heng project-te hi a rang thei ang bera tihhlawhtlin an tum thu Ministry of Textiles hotute hian an lo hrilh bawk a ni.