2883/2024-2025

Dated Aizawl, the 07 November 2024: Nimin tlai khan Mizoram Youth Commission Chairman Pu Malsawmzuala Ralte chuan, Conference Hall, Hotel Regency-ah Government Hrangbana College Career & Placement Cell, North Easterns Educational Consultancy leh Veda School of learning-te thawhhona kal tlanga Japan a hnathawk tura Job Offer hmu mi 34 zinga Mipa pathum leh hmeichhe pali te hnenah Japan-a an kalna tur Visa a hlan.

Visa hlannaah hian  Pu Malsawmzuala chuan Japan kal tum thalai te chu fuihin, tumruhna neia an tan tlat chuan vawiina kal tur te angin an hun tha a la thleng ve thuai dawna,  dawhtheihna leh tumruhna nei turin a fuih. 

Hrangbana College Career& Placement Cell, NEEC leh Veda School of Learning-te thawhona thuthlung chu hlawkthlak hlea a hriat thu a sawi a. Mizo thalaite chu ram dangah pawh chhuanawm tak leh ram hmel lanna an nih ang taka taimakna leh tumruhna chhawm nung zel turin a chah nghal bawk a ni.

Hrangbana College Career& Placement Cell, NEEC leh Veda School of Learning-te chuan, India sorkar leh Japan Sorkar-in a thawhhona thuthlung, Memorandum of Cooperation for Skilled Workers in Japan,18-Jan-2024-a an lo ziah tawh den chhen-in Nikum (2023) November thla atanga tan khan Japanese tawng zirna an lo buatsaih tawh a. Heta zirlaite hi Japan Rama Company te zinga hnathawk tur mamawhte chuan interview kal tlanga rawn thlang chhuakin Japan atangin an hna tur (job offer) an rawn pe ta thin a ni.

Tuna Visa dawng zinga mipa pathum te hi Fukuoka ah Semi Automatic Welding hna thawkin overtime tel lova INR 90000 vel hlawhin an awm ang a. Hmeichhia pali te hi Machine Inspection hna thawkin Kuwana, Mie Province ah awm thungin, anni hian JPY 160870 vel an hlawh bawk dawn a ni.

NEEC hian 2015 December leh January 2017 khan Mizo thalai 40 chuang Mizoram Sawrkar puihna in  an lo tir tawh a. Tunah hian chung  thalai rual te chuan Japan ramah hlawhtling takin hna an thawk mek a ni.