No.3113/2021-2022
Aizawl, 23rd November, 2021 : Vawiin khan Mizoram Youth Commission Chairman Dr. Vanlaltanpuia chuan Mizoram School of Photography leh Photography Club of Mizoram tangkawp buatsaih 4th Photographic Salon a hawng.

Khuallian Dr. Vanlaltanpuia chuan thusawiin India ramchhung leh International level-ah hnathawk leh mahni thiamna hmanga inelna lamah Mizo thalaite chu tanlak thar a ngai a ni a ti. Eizawnna tlak skill development neih a pawimawh tawh a, thiamthil neih sate pawh tihpun a, inzir belh zung zung a ngai a ni a ti. Tuina zawng neih loh chuan nun pawh hi a hlim thei tak tak lo va, chutiangin mahni tuina ngeia eizawn theih chu thil nuam tak tur a ni a. MYC chuan Mizo thalaite tan theihtawp a chhuah mek zel a, thalaite thiamthil hrang hrangte a ngai pawimawh vek a, chung zingah chuan Photography pawh hi a tel a ni tih a sawi. National Academy of Photography leh Federation of Indian Photography-a an inthlun zawmpui ta chu a hlu a, tun aia Photography hi eizawnna tlak a nih theih nan a tul angin thawhhona tha neih theih nan tan inla zel ang u a ti.

Exhibition hawnna inkhawm kaihruaitu Pu Malsawmtluanga, Founder-Director, MSP & PCOM report-a a tarlan danin Mizoram School of Photography chu kum 2017 a din niin, tunah hian zirlai 180 chuangin an zir chhuak tawh a. Sorkar leh mahnia eizawn nana hmang bakah, India ram leh ram pawn thlenga eizawn nana hmang an awm tawh niin a sawi.

He Photography Exhibition-ah hian tualchhung photographer mi 37 telin thlalak 119 phochhuah a ni a. Vawiina hawn tak Photographic Salon hi November ni 27, 2021 (Inrinni) thleng a duh apiang tan en theih leh lei theihin a awm ang.