3433/2023-2024

Aizawl, 22nd January, 2024: Vawiin khan Mizoram Youth Commission (MYC) Chairman thar Pu Malsawmzuala Rate chuan MYC office, Mizoram New Capital Complex (MINECO)-ah a hna zawmin bul a tan.

Pisa kai tan ni puala inkhawm buatsaihah MYC Chairman thar hian MYC chu ram hnuk pawimawh tak a nih avangin mawhphurhna sang tak a ko ah a tla tih sawiin, chona thar hmachhawn tur a nih avangin a tan pawh inzir chawp ngai tam tak a awm dawn tih a sawi a, Mizoram chhunga thalaite tana din a nih ang ngeiin MYC kaltlanga hmalak tul ang chi ah te, hma thar lakna tur chi te pawh thurawn engtiklai pawhin a la thei reng a ni tih a sawi a. Mizo thalaite kan that chhia tih tawngkam ri thin chu a ngaihdan a nih loh thu leh awih ve zawng a ni lo tih sawiin, thalaite zingah an thiam zawng, chak zawng leh rilrem zawng thawk a hlawhtlinpui turin hun remchang (opportunity) a vang a, an tuina zawng tak thawh a rem rih loh vanga sum la thawk chhuak lo, mahni ke a la ding thei lo, la intodelh lo leh la hlawhtling ve rih lo te kan ni thin zawk a, anni hi kaihruai a, an bana kai a an thiamna leh theihna tathriam a, chher hriam turin MYC hi din a ni a. Thalai lehkhathiam leh lehkha thiam lo, zir sang lo te thlengin kaihruaia kawng kawhhmuh turin theihtawp chhuah a tum tih a sawi a ni.

MYC Chairman thar Pu Malsawmzuala Ralte hi a nupui Pi Lalchhandami, a nu leh pate, party lama a thawhpuite, a thianthate leh a chhungte engemawzatin an tawiawm a ni.

MYC Chairman pisa luah tan puala inkhawm buatsaih hi Upa Lalthangliana Varte-i'n a kaihruai a, Upa Rinzawna, Mission Vengin hunserh hmangin fuihna thuchah a sawi a, Pu Malsawmzuala pa Pu R.Nelsona'n tawngtaina in hnu a khar a ni.