Vawiin hian Serchhip Auditorium ah Mizoram Youth Commission buatsaihin Youth Summit & Road Show, 2018 buatsaih a ni a, Pi Vanlalawmpuii Chawngthu, Minister of State  chu khuallian niin he show hi a hawng. 

A hawnna inkhawm tawi, Auditorium tuala buatsaihah Pi Vanlalawmpuii Chawngthu chuan, sawrkar in thalaite tan khawvel thar buatsaih a duh avangin infiamna lamah te, zirna lamah te, eizawnna peng dangah te thalaite tan hma a la nasa hle a, vawiinah chuan Mizo thalai, chhungkaw chawmtu kan neih belh nasa tawh hle a ni, a ti. Eizawnna kawnga hlawhtlinna hi sawrkara innghah ngawt chuan thui tak a thlen theih lohva, a thawktu, a titu mihringte inpekna leh taihmaknaah a innghat deuh vek zawk a ni. Miin theihna a neiha, hriatna a neiha, a kawng a hre bawk a nih chuan chungmite tanpui chu Mizoram Youth Commission te, NEDP hnuaia EDS atang tea tanpui theih an ni a, chutianga tanpui tlak thalai chu kana wm a tul a ni. Heng kan Commission te leh sawrkar policy dangte pawh tangkai taka kan hman theih nan kan inbuatsaih sauh sauh a tul tak zet a ni, a ti bawk. 

He inkhawm kaihruaitu Pi Sangchhin Chinzah, Serchhip Bawrhsap chuan, Youth Commission in Serchhip ah Road Show an buatsaih thei chu lawmawm a tih thu sawiin, Serchhip thalaite tan chona nasa tak, hmakhaw eng tak ni bawk a nih thu sawiin; tangkai taka he show hi hman a duh thu a sawi a. Zirlai kalkhawmte leh Show tlawhtu mipuite chu engkim belchianga, an tana tangkai tur chite chak taka umzui turin a chah bawk. 

He hunah hian Pu Ronald Lalchhuanawma, Youth Commission Officer pawhin thusawina hun hmangin Summit & Road Show an neih dan tlangpui a sawi a. Hetiang programme an rawn siam chhan chu Serchhip thalaiten zirnaah te, eizawnna kawng dangah leh thiamthil tinrengah hmasawnna neih phah ngei thei se, a tul ang zelin Youth Commission pawhin a theihna zawnah lo tanpui zel a duh a ni, tih te lo hria se. Hmasawnna tha tak thlentu ni thei ngei se kan duh ber a ni, a ti. 

He Road Show ah hian Stall 23 awmin stall hrang hrangten an thilsiam chhuah leh thalaite eizawnna kawnga an puih theihna hrang hrangte an tarlang a. Tlawhtu leh ngaihlutu pawh an thahnem hle a ni.