SARAS Fair, Mz SRLM, 2017 5th December, 2017 atanga hawn tan, Assembly Annexe a neih mek chu vawiin khan lawmman sem a ni a. R.D. Department Minister Pu R Lalzirliana’n a hman pui a. Zanriah a buatsaih sak nghal a ni.
Mizoram District hrang hrang atanga he SARAS Fair a rawn tel te hnenah lawmthu hrilh in khuallian Pu R. Lalzirliana chuan hmalakna kawng hrang hrangah Mizo hmeichhiate hi sulsutu pawimawh tak an ni a, Sorkar pawh in hei hi hria in hmeichhia te hamthatna turin hma a la chho nasa hle a, dinhmun leh chanvo tha tak tak ah a hlankai thu a sawi a. Chutih rualin hmeichhiate hian an dinhmun leh nihna pawimawh zia hria a, inchhungkhur uap tha tur leh ro hlu ber fanau te kilkawi tha in Pathian thu leh thu tha dang tea chawm ulukin, in chhunglum atanga bul tan tha in zan chhuak tam lutuk lo tur in a fuih nghal a ni.
Pathian thu in ‘Thawk lo chuan ei pawh ei suh se’ a tih thu sawilang in R.D Minister chuan Self Help Group te leh thawktu hrang hrang kalkhawm te chu midangte dawr dan leh dawnsawn dan te thiamin, an hnathawhah inthlahdah mai mai lova tihtak zeta ei hmu tlaka thawk zel turin a chah a. Ban phar sangin mahni chhehvela harsa zawk, Christmas ei in leh thlasik vawta intuam lumna nei tha lo te thleng phaka tuamhlawm nachang hre tur in a ngen a, a taka midangte chhawmdawl a tanpui mai bakah midangte tawngtaisak uar leh zual turin a ngen a ni.
Mizoram Sorkar, Rural Development Department hnuaia Mizoram State Rural Livelihoods Mission (MzSRLM) in Mizoram hmun hrang hranga Seif Help Group te tana kar hnih chhung awh Fair a buatsaih, Sales of Articles of Rural Artisan Society (SARAS) Fair -2017 ah hian Pu R. Lalzirliana heng a hnuaia lawmman dawngtute hnenah hian lawman a hlan :
1. Best District Award : Serchhip District (Award leh Cash Rs. 10,000/-)
2. Best Block Award : East Lungdar Block (Award leh Cash Rs. 7,000/-)
3. Best Stall Award : West Phaileng VO - I (Award leh Cash Rs. 5,000/-)
4. Special Award/Highest Block Sales Award : Serchhip R.D Block (Award leh Cash Rs. 7,000/- a hlan a. Pi Vanlalawmpuii Chawngthu, Minister; Pu R. Lalrinawma, Dy. Speaker; Pu Lalrinliana Sailo, MLA; Pu T. Sangkunga, MLA bakah department officer ten he hun hi an hmanpui a ni.
Vawiin programme Pi K.Lalrinzuali kaihruai ah hian Pi H. Lalchhandami, Chief Executive Officer, MzSRLM in Award sem a nih dan leh tehfung hrang hrang hman a nih dante report a pe a. Kumin 2017 SARAS (Sales of Articles of Rural Artisans Society) Fair ah hian MzSRLM in a tuam, Rural Developmet Block 17 atang leh PMKSY, DRDA, Aizawl hnuai atangin Thingsulthliah Block Self Help Group (SHG) te nen Group 100 chuang zet an tel a. Fair hi mipuiin an hlut hle a, naktuk ni 15.12.2017 thleng hawn a ni ang. Vawiin 14.12.2017 thlenga SHG hrang hrang ten an thil dehchhuah an hralhna tlingkhawm hian Rs 24,17,694/- a tling tawh a ni.
