Mizo Zirlai Pawl(MZP) General Headquarters in HSLC 2012 Top Ten-a Mizo tlingte chawimawina hun vawiin dar 11:30 AM a Vanapa Hall-ah an buatsaih chu Education Minister Pu Lalsawta’n a hmanpui.

Pu Lalsawta chuan MZP in hun engemaw chen atanga zirlai hlawhtlingte chawimawina hun an buatsaih hian zirlai dangten tan chho chhuahna leh tihphurna a siam thusawiin hei hi mahni hlawkna um emaw, lansarh duh vang emaw ti an ni lo a, zirlaite hma lam hun ngaihtuah a, an tangkaipui ngei theihna rilru pu chungin an buatsaih a ni a ti. Minister hian mahni zirlai zir tha te chu Zirna lamah an hlawhtlin rualin Pathian leh mahni thenawm khaw vengte duh zawnga awm dan an zir thiam tel tir theih thu a sawi bawk.

Tunlai naupangte hian lehkhabu dang chhiar duhna rilru (reading habit) a tlak hniam chu pawi a tih thu sawiin Minister chuan mahni zirlai bu piah lamah lehkhabu dangte tun aia uar turin a zirlaite a chah a. Pu Lalsawta chuan nu leh pate chuan thil tam tak ngaihtuah nei mahse dam chhunga a pawimawh ber chu an fate a ni tiin tun aia an fate zirna lamah buaipui leh zual turin a ngen a. Zirlai titha te chu hun lo kal zel turah ram leh hnam nghahfak an ni tiin duhsakna hlan bawk a ni.

Tun tum HSLC Exam a hian Mizo zirlai 18 Top Ten-a an tling a, an hnenah hian Minister chuan thuziak leh Rs. 2,000/- theuh a hlan nghal a. Mizo zirlai titha puala chawimawina hun hi MZP chuan kum 1995 atang khan an lo buatsaih tawh thin a. He hun ah hian MZP President Pu James Thanghmingmawia leh HSLC 2012-a pakhatna C.Laldintluangi te pawhin thu an sawi bawk a ni.