Vawiin chawhma khan Mizoram University Sports Meet vawi 8 na leh PUC Stadium chu Pachhunga Univeristy College-a inkhawm buatsaihah Sports Minister Pu Zodintluangan a hawng.

 

 

Sports Minister chuan thu sawiin Mizoram University thuneitute chungah he hun hlu tak chang tura ruat a nih avangin lawmthu a hrilh a. Pachunga University College hi Mizorama zirna sanga hma hruaitu 1958 lam daiha din a nih tarlangin he college atang hian mi hman tlak leh fel tak tak zofate hriat tham engemawzat an chhuak tawh a ni, a ti a. An mamawh ber pakhat khelmual atan pawh zirlai leh zirtirtu ten thawhlawm te thawhkhawma theihtawpa tan an la thin tih a hriat avangin a lawm thu a sawi lang bawk. Pu Zodintluanga chuan Mizoram sorkarin thalaite hmakhua atan infiamna hmunhma a buatsaih dan sawiin Rajiv Gandhi Stadium bul tan te, Lunglei Zobawk-a Sports Complex sakna tur kalpui mek te leh ‘Catch Them Young’ policy chu khawpui leh District Headquarters-ah te pawh kalpui zel a ni dawn a ti a. Zirlaite chu zirtirtute zah thiam leh an thu ngaichang reng turin a chah a ni.

Mimal zalenna changchawia midangte harsatna leh rokhawlhna siamtu nih chu thil dik a ni ngai lo tiin Pu Zodintluanga chuan zalenna tih hian mawhphurhna a keng tel ngei ngei tur a ni zawk, a ti bawk.

Minister hian khelmual mamawhte tih phuisuinan sum lama a tanpui tur thu a sawi bawk.

He College Sports Meet-ah hian Mizoram hmun hrang hrang atangin College 18 an lo tel a, intihsiakna chi ruk, Football, Basket ball, Hockey, Volley ball, Table Tennis leh Chess-ah te in mipa leh Hmeichhia ah inelna siam a ni.

He Sports Meet hawnna ah hian Prof. A.N. Rai, Vice Chancellor MZU chuan inlawmna thuchah a sawi a, Pu Benjamin Registrar leh Pu F. Lawmkima Asst. Director sports, MZU te pawhin thusawina hun an hmang a ni.