No.3856/2021-2022

Aizawl 31st January, 2022: National Bank for Agriculture and Rural Development (NABARD) Champhai buatsaihin vawiin khan BDO Conference Hall, Khawbungah Azadi Ka Amrit Mahotsav (AKAM) pualin SHG Member-te tan programme buatsaih a ni a. He hunah hian BDO Khawbung Pu K.Lalhlimpuia chu khuallian niin, Azadi Ka Amrit Mahotsav lawmna hnuaia hmalaknate bakah NABARD hmalakna leh hnathawh hrang hrangte tarlan a ni.

Pu K.Lalhlimpuia, BDO, Khawbung RD Block chuan thingtlang a hmasawnna ruhrel siam leh Agriculture leh a kaihhnawih kaltlanga loneitute tihhmasawn kawnga NABARD hnathawhte chu fakawm a tih thu a sawi a. Mizoram State Rural Livelihoods Mission (MzSRLM) kaltlangin kum 2017 atanga farm livelihoods chawikanna tura hmalak tan a nih thu sawiin, hei hian khawsak harsa zawkte leh hmeichhe puih ngai zualte tan hmasawnna langsar tak a thlen thu a sawi a. NABARD Self Help Group nena hmachhawp leh tum inang reng a nih avangin MzSRLM chuan a theih leh remchan dan ang zelin NABARD nena tangkawpin thingtlang mite khawsak chawikan kawngah tan a la zel dawn a ni, a ti a. Self Help Group member kalkhawmte chu thawhhona tha tak nei a, an hmalakna hrang hrangah hlawhtlinna chang thei tura theihtawp chhuah zel turin a chah a ni.

Pi H.Lalhmachhuani, DDM, NABARD Champhai chuan program neih a nih chhan tarlangin, NABARD hnathawh hrang hrang RIDF, WIF, Refinance, Financial Inclusion, Tribal Development Fund, Farm Sector Promotion Fund, Off-Farm Development - OFPO, Rural Haats, Rural Marts/Mobile Mart, Institutional Development, Springshed Development, SHG linkage leh a dangte Powerpoint presentation hmanga entirin a sawifiah a. Champhai District chhunga NABARD hnathawhte a tarlang bawk.

India ram zalenna kum 75 na tlin hriatrengna leh lawmna Azadi Ka Amrit Mahotsav (AKAM) program kaltlang hian Mizoram chhunga NABARD hnathawh hrang hrangte powerpoint presentation hmanga tarlan niin, he huna tel SHG member te nen inkawmhona hun hman a ni bawk a. SHG member kalkhawmte chuan NABARD kaltlanga thingtlang mite tana hmalakna leh puihnate bakah, hlawhtlinnate chu hmuh nuam an tih thu leh hlawkpui an tih thu an sawi a ni.

Khawbung RD Block, MzSRLM, BMM te kaltlangin tun Financial Year 2021-2022 ah hian MRB Khawbung Branch-ah SHG Loan dilna thar Fresh Loan Application 30 leh tihnun thar ngai Renewal Loan Application 36 thehluh tawh niin, tunah hian MRB Khawbung Branch-ah loan dilna lut tang mek a awm rihlo a ni. Bungzung Branch-ah SHG Loan dilna thar 1 leh tihnun thar ngai 16 thehluh a ni a, buaipui lai 15 a awm mek a ni. MRB Farkawn Branch-ah SHG Loan dilna thar 16 leh tihnun thar ngai 43 thehluh a ni a, dilna thar lut 3 te buaipui mek niin, loan tihnun thar ngai dilna lut 19 te buaipui mek a ni bawk.

Khawbung RD Block-ah hian SHG Group 80 tan Renewal Loan Rs.3,56,20,000/- pek chhuah tawh a ni a, SHG 54 te hnenah Fresh Loan Rs.43,30,000/- pek chhuah tawh a ni a, loan thar dilna Fresh Loan Application buaipui mek 3 leh Loan tihnun thar ngai dilna Renewal Loan Application buaipui mek 34 awm a ni.