No.1372/2021-2022

Aizawl the 13th July, 2021 : Vawiin khan National Bank for Agriculture and Rural Development (NABARD) chuan an din kum 40-na (Foundation Day) lawmna hun NABARD office, MINECO, Aizawlah an hmang a. Cooperation leh Agriculture changtu Minister Pu C.Lalrinsanga chu khuallian a ni.

Minister Pu C.Lalrinsanga chuan NABARD kum 40 tlin lawmpuiin NABARD hian Mizoram tan thil nasa tak min thawhsak tawh a, min thawhsak mek zel a, a bikin agriculture leh cooperation movement lamah phei chuan nasa takin Mizoram State-in kan chhawr a ni, a ti. Mizoram sawrkar chuan Agriculture leh a kaihhnawih tihhmasawn kawngah ngawrh lehzualin hma a la a, heng sector-ah te hian cooperative movement lalutin tanrual leh thawhhona hmanga hlawhtlinna hmuh chhoh a tum mek a. Hemi kawngah pawh NABARD chuan a thawhhlawk hle tih sawiin Minister chuan Farmer Producer Organizations (FPO) din kawngah te, Mizoram Cooperative Apex Bank (MCAB) kaltlanga Primary Agricultural Credit Societies (PACS) din chungchangah te, Alternative Investment Funds (AIFs) chungchang thlengin kawng hrang hrangah hmasawnna rahbi thar Mizoramin a kai theihna turin hna an thawk a ni, a ti.

Thingtlang mite hmasawnna tur leh eizawnna ngelnghet an neih theihna turin NABARD hi July ni 12, 1982 khan a lo ding tan a. Agriculture leh Rural Development ah nasa takin NABARD hian tha a thawh a ni. Mizoramah chuan kum 1989-ah lo lutin tunah hian Regional Office neiin General Manager kaihhruaina hnuaiah an awm a, Mizorm State Government, bank leh financial institution dangte bakah NGO te nen tanghoin hmasawnna hna an thawk a ni.

Vawiin programme-ah hian NABARD General Manager Pi Lalfakzuali Langel chuan NABARD nihphung leh hnathawh dan tlangpui a tarlang a. State Level Bankers' Committee (SLBC) Convener Pu LP Lalchangkima, MRB Chairman Pu Vadde Jaya Chandra, MCAB Chairperson Pi Lalmuanpuii leh MCAB CEO Pu Lalzuahliana ten thu an sawi a. MCAB kaltlanga NABARD hmalakna pawimawh tak PACS Development Cell hmalakna ngaihthlak a nih bakah “Success Story of 17 PACS in Mizoram” tih lehkhabu chu Minister Pu C.Lalrinsanga hian programme-ah hian a tlangzarh bawk. PACS palite tanpuina tur sanction order chu MCAB Chairman Pi Lalmuanpuii hnenah hlan niin khuallian hian NABARD-in Mizoram Rural Bank hnena an pek Mobile ATM Van chu a vailiam nghal bawk a ni.