Vawiin khan Aijal Club ah National Bank for Agriculture & Rural Development (NABARD) bultumin Seminar on Self Help Group (SHG) neih a ni a. NABARD chuan he hun hmanpuitu khuallian Pi Lal Riliani chu Patron for Mizoram nihna a hlan nghal a ni.
Khuallian Pi Lal Rilianai chuan Sorkar-in loneitu leh kut hnathawktute tanpui tura a din NABARD Bank Mizo ten tangkai taka kan lo hmangchho ta chu a lawmawm a, mi harsa leh dinhmun hniam zawkte khaichhuahna pawimawh tak a nih thu a sawi. Pi Lal Riliani chuan NABARD kaltlanga loan latu Self Help Group hrang hrangte kutchhuak chhungkaw chawm nana mi tam tak in an hman dan sawiin, kan kutchhuak te uluk a ngaih thu leh ram dang atanga khualtha lo zinte lo ngaihhrui na atana pekah pawh chhuantlak leh belhchian dawl ni thei se tha a tih thu a sawi a; Mizo kutchhuak anihna pho chhuak chiang tur leh a hlutna leh a tira a nihna (Originality) tibo khawpa state dang kutchhuak nena chawhpawlh kual vak loh nise a duhthu a sawi.
Self Help Group member te thawhrimna leh inpekna te, NABARD ten loan hmanga theihtawp an chhuahpui na ah lawmthu sawiin, Pi Lal Riliani chuan Bank atanga loan lakah hian fimkhur a ngai a, Loan chu rulh leh tura sum puk anih tih hriat chu SHG rahbi pawimawh tak a ni a, midangte pawh hrilhfiah thei tura kan chian a ngai a ani a ti. Thawhchhuah a tam avanga hmanchhuah tam tum kher lovin, a khawlkhawm(Savings) lamah te tanlak a ngai a ni tiin, tul lova sum kan hmanna tam tak a bikin Zuk leh Hmuam te hi hrisel zawkna atana bansan ngam a tul tih a sawi a, chhungkua khaiding tura Sorkar in NABARD kaltlanga hma a lak pui na chuan rahtha tak a chhuahpui zel theih nan rinawmna leh taimakna nen hmala a hmasawn zel tura duhsakna hlanin a chah bawk a ni.
NABARD hi Mizoram-ah August, 2003 khan Champhai-ah hawn tan a ni a, kumin March thla tawp thleng khan Self Help Group Savings Bank Account nei mi 4842 an awm tawh a ni. Kum kalta chhung thleng khan cheng vaibelchhe 42 nuai 60 sing 9 leh sang 6 loan an pechhuak tawh a ni.
Vawiin Programme hi Pu Jubilee, NABARD Mizoram RO, Champhai District in a kaihruai a, Pu S. Sankaranarayanan, DGM, NABARD RO Mizoram in Seminar chungchang sawihawnna a nei a, Pu D K Mishra General Manager, NABARD Mizoram RO, Aizawl in Power Point Presentation hmang in Self Help Group chungchang leh kalphung a hrilhfiah a ni. Nilengin inzirtirna leh sawiho na in hun hman a ni.
