3971/2022-2023

Aizawl the 24th March 2023: Vawiin khan Seminar Hall, Education Department, Mizoram University-ah ‘Nation-wide Campaign on Ashwagandha & State Level One-Day Workshop’ chu Dr. C. Lalzepuii, Principal Director, Health and Family Welfare Department (H & FW); SMPB member secretary, Mizoram ni bawk chuan khuallian niin a hawng.

He hawnna inkhawmah hian Dr. C. Lalzepuii chuan State Medicinal Plant Board (SMPB) chu Mizoram-ah kum 2001 khan Health and Family Welfare Department hnuaiah din a nih thu a sawi a. Kum 2014 ah Sawrkar laipuiin National Medicinal Plants Board chu Ministry ding thar Ministry of AYUSH hnuaiah a dah tak avangin State Medicinal Plants Board pawh Directorate of AYUSH hnuaiah dah a nih thu a sawi.

Chief Guest chuan SMPB thiltum chu Mizoramah ramhmul damdawi chin, humhalh, a chungchang inhrilhhriat leh kawng hrang hranga ti changtlung tura hma lak a nih thu a tarlang a. Chung tihlawhtling tur chuan theihtawp chhuah niin ram tana rotling herbal garden siam te, school naupangte tana ramhmul damdawi chungchang inzirtirnate neih thin a nih thu a sawi. Khuallian Dr. C.Lalzepuii chuan a sawi zelnaah Mizoram in nationwide campaign on Amla –Sunhlu (Emblica officinalis)" leh Giloe- Hrui-van-kai (Tinospora cordifolia)" te pawh a lo kalpui tawh thu a sawi bawk.

Programme huaihawttute chu fakin Dr. C.Lalzepuii chuan ramchhung huap campaign chu Mizoramah a hlawhtlin ngei a rin thu a sawi a, ramhmul damdawi humhalhna kawngah leh inhrilhhriatna kawnga rahbi thar kaina tur pawimawh tak a nih a beisei thu a sawi.

Dr. S. Mara Thansiami, Deputy Director, Directorate of AYUSH pawhin thu sawiin AYUSH damdawite hi natna benvawn, nu leh naupang enkawlna tha, him leh rintlak tak a ni, a ti a. Tunlai khawvela natna hluar tak rilru lam harsatna enkawl nan pawh AYUSH damdawi chu hmantlak tak a nih thu a sawi tel bawk a ni.

Prof. B.P. Mishra, Dean; School of Earth Sciences & Natural Resource Management, MZU pawhin thu sawiin thlai chi tinreng hian damdawi atana tangkaina an nei vek a, tamtak chu la hmuhchhuahloh vang mai a ni, a ti. Mizoram chhunga ramhmul damdawite a mang mai loh nan theihtawp chhuah zui zel turin zirlaite leh research beitute ngawrh zawka tan la turin a fuih bawk.

He ‘Nation-wide campaign on Ashwagandha & State Level One-Day Workshop campaign’ hi State Medicinal Plants Board (SMPB), Mizoram National Medicinal Plants Board (NMPB), Ministry of AYUSH leh Department of Horticulture, Aromatic & Medicinal Plants-te tangkawp a buatsaih a ni a. Dr. Lalkhawngaihi Renthlei, Chief Executive Ofiicer (SMPB), Directorate of AYUSH in lawmna thu a sawi. Chawhnu-ah presentation leh sawihonate neih niin Dr.T. Lalliankimi, Programme Officer, SMPB, Mizoram in lawmthu sawiin hun hi tihtawp a ni.

Ashwagandha (withania somnifera), ‘Indian Ginseng’ emaw ‘Winter cherry’ ti a hriat bawk hi India rama ramhmul damdawi ngaihhlut ber te zinga mi a ni a, National Medicinal Plant Board of India pawhin a a ngaihpawimawh bikte zinga mi a ni.