India President-in Zirtirtu tha leh tling hnena Chawimawina ropui tak a pek thin ‘National Award to Meritorious and Outstanding Teacher’ chu Lalhmingmawia Ralte, Lecturer, Govt. Republic Higher Secondary School leh C. Biaknghinglova, Headmaster, Ramhlun North P/S-te chuan September 5, 2012 (Teacher’s Day) hian New Delhi-ah Shri Pranab Mukherjee, President of India hnen atangin an dawng dawn.

Lalhmingmawia Ralte hi North Serzawl-ah piangin Darlawn-ah an pem a, tunah chuan Ramthar Veng, Aizawl-ah an chhungin an cheng mek. A nu chu Nuchhungi(L) a ni a, a pa chu R. Thangluaia a ni. Pianpui unau mipa 2 leh hmeichhia 4 a nei. April 8, 1993 atangin Country Boarding English Medium School-ah Zirtirtu hna a thawk tan a, Govt. Bethlehem Vengthlang M/S II-ah Headmaster hmasa ber niin June 25, 1996 -ah Plus Two hawn tan a nih khan Higher Secondary-ah Lecturer-in a lut a ni.

Ni 8. 8. 2008-ah Govt. Republic Higher Secondary School-ah a thawk tan. Kum 2008 hian Award pathum— Broad Outlook Learner Teacher Award (District Level); Broad Outlook Learner Teacher Award (State Level) leh Long Service Decoration Award a dawng. Nikum August 15, 2011 khan Mizoram Chief Minister Pu Lal Thanhawla kut atangin State Award to Meritorious and Outstanding Teacher a dawng tawh bawk.

Kohhran leh Khawtlangah mi inhmang tak a ni a, thuziak lam a tui em em bawk. Lehkhabu hi bu 8 a ziak tawh a, Articles 150 vel a ziak tawh. Sermon 50 chuang a ziak tawh a, Hla 40 vel a phuah tawh. Short-play Drama 4 a ziak tawh bawk. India ram aiawhin International Level-ah vawi 10 chuang a kal tawh.

Serchhip District-a Secondary Level-ah Scout din hmasa bertu a ni a, India President hnen atanga Award dawng 16 chher chhuakin leh Governor Award dawng 38 chher chhuaktu a ni. |halaite dinhmun chawisàn a duhna leh zuk leh hmuam, ruih theih thil lama an fihlim theih nan tiin Karate leh Boxing-te a phurpui thin a, Serchhip District Karate Association dintu leh bul tantu, General Secretary hmasa ber a ni. Serchhìp District Academy of Letters dintu zing ami, Founder Secretary a ni bawk.

C. Biaknghinglova hi Leithum (Champhai District)-ah January 1, 1959 khan a lo piang a, a pa chu Thanseia(L) a ni a, a nu chu Tialchuaii(L) a ni. Pianpui unau mipa 5 leh hmeichhia 2 a nei. May 11, 1976 khan Hrangmani nèn an innei a, fapa 3 leh fanu 1 an nei. March 1, 1981-ah Zirtirtu hna a thawk tan a, October 4, 1991-ah Headmaster-ah a kaisang. Vanbawng P/S I, Ramhlun P/S IV, Ramthar P/S III, N.Chaltlang P/S, Armed Veng P/S IV, Edenthar P/S, Ramhlun P/S I ah a thawk tawh a, tunah hian Ramhlun North P/S ah a thawk mek. Tunah hian Ramhlun North, Aizawl-ah an chhungkuain an khawsa mek a ni.

State Award hi kum 2005 (2.10.2005) khan A.R. Kohli, Governor of Mizoram hnen atangin a dawng tawh. Tunah hian Mizoram Primary Teachers Association-ah President a ni mêk. Khawtlang leh Kohhranah a phak ang tawkin a inhmang a, nihna pawimawh tak tak a chelh thin.