377/2025-2026

Siaha the 29th April 2025: National Commission for Scheduled Tribes (NCST) Chairman Pu Antar Singh Arya leh member dangte chu vawiin chawhnu dar 2 khan Siaha an lo thleng a, helipad-ah Mizoram Sawrkar leh MADC a mi pawimawh ten an lo hmuak.

NCST Chairman pual programme hi CEM Bungalow tual zawlah buatsaih a ni a, ECM Assembly Moderator Rev Vabeinocho chuan Pathian hnena inenkawl tirna tawngtaina a nei a, MADC Dy CEM Pu S Lalremthanga chuan NCST Chairman leh Member-te chu Scheduled Tribes-te tana an thahnemngaihnaah lawmthu a hrilh a, Hnam humhalhna leh hmasawnna kawngah theihtawp chhuahpui turin a ngen.

Siaha Deputy Commissioner Pu VL Hruaizela Khiangte pawhin NCST Chairman leh member-te chu district mipui aiawhin lawmthu a hrilh a, Siaha District dinhmun tlangpui tarlanna neiin District mipuite hamthatna ngaipawimawha an rawn kal thei chu ropui a tih thu a sawi. Siaha District hmasawnna turah theihtawp chhuahpui turin a ngen bawk.

NCST Chairman Pu Antar Singh Arya chuan amah lawmna programme buatsaihtu Dy CEM leh a thawhpuite bakah Mizoram sawrkar hotute chu lawmthu a hrilh a, NCST chu Tribal te tana thawk tura din an nih angin ST te hamthatna turin kawng hrang hrangin hna an thawk thin tih a tarlang a, India ram Prime Minister leh President pawhin kawng hrang hranga tribal te hmasawnna chu an ngaipawimawh takzet tih a sawi. Hnam zia rang leh tawng humhalh a nih theih nana Autonomous District Council an hmuh theih nana theihtawpa lo beitu hruaitu hmasate zarah ADC an nei thei chu malsawmna a ni a ti a, Hnam anga a dinchhuah a, hma a sawn zual zel theih nan dikna leh rinawmna nen Ram leh Hnam tan theihtawp chhuah chhunzawm zel turin a chah a, zirlai naupang kalkhawmte pawh Nakin lawka ram Hruaitu tur te an ni tiin zirna ah tang sauh sauh turin a fuih bawk a ni.

Thu a sawi zawh hian Pu Antar Singh Arya chuan Bungalow tual zawlah hian Hraisua (Cherry Blossom) thing tiak a phun nghal a, MADC a Conservator of Forest (CF) Pu Thaly T Azyu leh a hoten an tawiawm a ni.

Khuallian in thu a sawi zawh hian Siaha a Pawl hrang hrang, ECM Assembly MTP Hqrts , MCHP Hqrts , MSO Hqrts , MHP Hqrts hruaitute chu kawmin an mamawh leh duh te an thlen a, MADC leh LADC a hotute nen inkawmna hun an nei chhunzawm nghal bawk a, harsatna hrang hrang a hnena an thlente sut kian a nih theih nan theihtawp chhuahpui a tum thu a lo hrilh a ni. Vawiin tlai vek khan Aizawl panin an thlawk chhuak leh nghal a ni.

Vawiina rawn kal te hi NCST Chairman Pu Antar Singh Arya bakah Member dangte Dr Asha Lakra, Pu Jatothu Hussain leh Pu Nirupam Chakma te an ni.