Vawiin chawhma khan Health Directorate Conference Hall-ah ram pum huap Dengue natna dona ni 'National Dengue Day' hman a ni a. Dr.Lalrozama, IAS, Mission Director, NHM chuan hun a hmanpui.
Vawiin National Dengue Day hi Dr.HC Thangkima, State Programme Officer (VBD) in Chairman niin a kaihruai a. Chairman chuan kalkhawmte lawmna thu hnuah Dr.Zorammuana, M&E Consultant-in Powerpoint Presentation hmangin Mizoram leh India ram chhunga Dengue natna chungchang sawifiahin zirtirna hun a hmang bawk a ni. He huna thusawitu Dr.Lalrozama, IAS, Mission Director, NHM chuan, Dengue chu tih takzeta do ngai a nih thute, mipui te hnena awareness uar lehzuala pek a ngaih thu te tarlangin thawktu kalkhawmte chu mahni khawtual NGO hrang hranga Dengue awmzia leh nihphung thehdarh hna kalpui theuh turin a chah a ni.
Dr.Zorammuana, M&E Consultant report-a a lan danin Dengue natna hi kum 2012 atang khan Mizoramah hmuhchhuah leh finfiah tan a ni a.
Hetiang hian kum 2012 atang khan a vei hmuh chhuah a ni.
2012 = 6
2013 = 7
2014 = 19
2015 = 43
2016 = 580 (out break) veng hrang hrangah
2017 = 136
2018 Apr thleng = 34
Tun dinhmunah Dengue hi Mizoram chhungah thihpui kan la awm lo ni a hriat a ni. Thihpui kan la awm loh na chhan ni a lang chu Dengue hi serotype hrang hrang hrang chi 5-a then a ni a.Mizorama awm hi Serotype 3 a hlauhawm nep chi a ni a.Amaherawh chu tunhnaiah West Bengal leh Kolkatta lamah te Dengue hlauhawm Serotype 2 a pung nasa hle a. Hetiang a nih avang hian mipui kan zin veivah nasat tawh avangin serotype 3 pawh hian kan ram rawn thleng ve thei reng a ni a. hei vang hian kan fimkhur a ngai tak zet a ni.
Dengue hi July atanga December thla inkar hi a hluar hun chhung a ni a. Hemi hun chhungah hian theih tawp chhuaha inven hi kan mawhphurhna a ni. Mahni in leh a vel vawngfai a, tho si pian theihna tuitling tih bo bakah dengue thosi te hian khaw en laia mi seh an chin avangin zanah chauh lo pawh khawen lai pawhin kan fimkhur a ngai tak zet a ni.
