Chief Minister Pu Lal Thanhawla chuan National Development Council Meeting vawi 57-na nimina Vighyan Bhawan, New Delhi a neih ah Mizoram mamawh te leh tul dang te a sawi chhuak.
Chief Minister chuan Dr. Manmohan Singh kaihhruaina a UPA sawrkarin chak zawka hmasawnna kalpui a, mitin thleng phak tur hmasawnna ziktluak kan neih theihna tura 12th Five Year Plan a chhawpchhuah ah UPA Sawrkar chungah lawmthu a sawi a.
Hmarchhak bialah rampuma tui tlan tur 34% a awm (surface water) avangin 12th Plan chhunga Integrated Water Resource Management Programme siam tha a tih thu a sawi a. Hmasawnna ruh rel power, communication, industry etc. ah te private investment a awm theihna turin lawmman te siam a, VGF guidelines te pawh a tul anga her danglam theiha siam turin rawtna a siam bawk a.
Sorkar laipui in zirna sang zawk, Higher Education Sector ah investment tam zawk siam a tumna chu tha a tih thu sawi bawkin, state hnufual Mizoram angah chuan college awm zawng zawnga 75% in classroom leh hostel an neih loh avangin, UGC Fund hmang thei tur chuan UGC Guidelines siam that a tul thu a sawi a. College leh Hostel building te sak anih theih nan state hnufualte tan National Policy siam tul a tih thute a sawi a ni.
Mizoram Primary school ten National norm an zawm ve theih nan SSA guidelines te pawh siam that tul a tih thu a sawi bawk a. Vantlang hriselna lam pawh ngaipawimawha, zauzawka kalpui anih theihna tura Nartional Rural Health Mission in khawpui pawh tuam tel tura tih a ni chu lawmawm a tih thu a sawi a. Ruahmanna ah state hnufual Mizoram, Arunachal Pradesh leh Nagaland ah te Medical College siam rawtna a awm loh thu sawilangin, Chief Minister chuan 12th plan chhung ngei a Medical College leh khum 200 awmna tur District Hospital leh natna zawnchhuahna khawl, diagnostic equipment te siam ngei nise a ti a. Thingtlang kilkhawr zawkte tan village clinic te siam tha a tih thu a sawi bawk a ni.
Chief Minister chuan inkalpawhna lamah central sawrkarin Surface Transport, PMGSY, NLCPR leh NEC te kaltlang a hmalakna te chu fakawm a tih thu a sawi a. Mizoram bikah chuan 12th Plan chhungin kan kawng neih sa hi 50kms/100sqkm ah tal tipunga, chumi atan Rs. 7828 crore a tul tur thu a sawilang bawk a. Hei hi tihpuitlin anih loh chuan kum 50 chhungin National Road Density hi kan phak lovang a ti a. Chuvangin, central sawrkarin Hmarchhak States te tan Special Road Project a siam a tul dawn a ni a ti.
Telecommunication chungchangah Mizoram chuan ala duhkhawp lo hle a ni Chief Minister chuan a ti a. 10th plan a USOF hnuaia Mizoramah Mobile Tower 71 siam tura ruahmanah 19 chauh siam zawh a la ni a ti a. Leihnuaia OFC phum kaltlanga kawng siam avang leh leimin avangte a a chhiat fo thu a sawi a. Hengte hi 132kv tower hmangin OPGW in thlak mai a that a rin thu a sawi bawk a ni.
Planning Commission in Centrally Sponsored Schemes hrang hrang a State Matching Share rualkhai zawka kalpui a tum chu tha a tih thu Chief Minister chuan a sawi bawk a ni.
National Development Council Meeting-ah hian Prime Minister , Dy. Chairman, Planning Commission leh Union Ministers te an tel a. Chief Minister hi Pu P.L. Thanga, State Planning Board Member- Secretary, Pu T.P. Khaund, Principal Advisor to Govt. of Mizoram leh Pu Dharmendra, Resident Commissioner, Mizoram House, New Delhi ten an tawiawm a ni.
