Vawiin khan National Disaster Management Meeting pawimawh tak State Guest House-ah an thu a. He meeting-ah hian State pawn atangin M. Shashidar Reddy, Vice Chairman, NDMA; K.M. Singh, Member, NDMA; B. Bhattacharjee, Member, NDMA; PP Srivastava, Member, NDMA; Sivaji Singh, Senior Specialist, NDMA; AK Singh, Commandant, 1st Bn. NDMA; Director, NESAC leh Director GSI an rawn tel a ni.
Inkhawm hi Chief Minister Pu Lal Thanhawla’n a kaihruai a. Member-te lawmna thu sawiin India ramah chhiatna rapthlak tak tak a thleng thin a, Mizoramah phei chuan thlipui, leimin leh kangmei avangte in chhiatna rapthlak tak tak kan tuar kumtin a ni a ti a. Chhiatna tam tak hi khuarel awm bawk mahse mihringin kan siam chawp chhiatrupna thleng thei a tam em em a, Mizoramah phei chuan kan in sak dan leh kawnglaih kopang sang takte avangin chhiatna rapthlak tak tak kan tuar fo a ni.
Hei hi hriain invenna hi a damdawi aiin a tha zawk an tih angin Mizoram ah pawh Disaster Management & Rehabilitation ten nasa takin tan an la a, chuti chung chuan chhiatrupna thleng thei lakah invenna ngawrh lehzuala kan kalpui a tul hle a ni, a ti. He meeting hian rah duhawm tak a chhuah ngei a beisei thu leh sawihonaah pawh member-te rilru inhawng taka sawi turin a sawm a ni.
Vice Chairman National Disaster Management M. Shashidar Reddy pawhin thusawiin India ramah a bik takin hmarchhak states ah chhiatna rapthlak tak tak a thleng tawh a. Kum 1950 a Assam lirnghing leh tunhnaia Sikkim a lirnghing avangte khan mi tam takin nunna an chan a. Tuilian, thlipui leh leimin te avangin hmarchhak state hrang hrangah chhiatna a thleng deuh fo a, chuvang chuan nasa lehzuala NDMA pawhin tanlak a tum thu a sawi a ni.
He meeting-ah hian Mizoram DM & R Department Principal Secretary Pu P.C. Lawmsanga’n tunhnaia Mizoram DM & R Department hmalakna hrang hrangte tarlangin Second Indian Landslide Congress, Guwahati-a an neih leh Regional Consultation on Earthquake, NEIST Jorhat-a an thurelte Mizoramin an bawhzui dan te a tarlang bawk.
Power point presentation hmangin Dr. Lalrokima Chenkual, ATI leh Dr. R.K. Lallianthanga, Project Director, MIRSAC ten Mizoram dinhmun leh chhiatna an lo tawh tawh dan hrang hrangte an entir a. Member ten sawihona hun tha tak an nei zui a ni.
He meeting-ah hian Pu Lalthanliana, LAD Minister, Pu Nihar Kanti Chakma, Minister of State, DM & R; Chief Secretary Pu Van Hela Pachuau; Pu P.L. Thanga, Vice Chairman Planning Board te bakah a kaihhnawih department hotu lian hrang hrangte an kim hle.
