Naktuk December 14, 2013 hi ‘National energy Conservation Day’ a ni a. He ni hi ram pumah kum tinin Energy Conservation Act 2001 tih hlawhtlin nan hman thin a ni a, Delhi-ah pawh Vigyan Bhawan-ah urhsun taka ram pum huapa hemi lam hawi thu inchah nan hman thin a ni. Hemi denchhana mipuiten hre thar sela, ram chhunga Energy kan hman mek riral mai mai lovin, renchem leh awmze nei tak leh fimkhur taka hman hi kan mamawhin kan in zirtir zel hi a tul takzet a ni.

Energy siam chhuah hi thil hautak tak mai a ni a, pawisa tam tak leh tha leh zung nasa taka sen ngai a ni a. Chuvang chuan a hmanral danah pawh renchem a tul takzet a ni.

Inchhung leh pawn atana kan hmanin current heh lo chi heng LED (Bulb/Tube) leh CFL (Tube) te hi hmang thei hram ila a tha hle. Kan awm lohna hmun apiang OFF zel bawk nise. A dang heng Refrigerator, Washing Machine; Television, Air Conditioner; Induction Motor, Ceiling Fan; Fan, Electric Geyser; LPG Stove leh khawl dangte BEE Star Label chuang ngei hmang uar ila, heng hian energy a heh lova, chu chuan kan bill pawh a ti tlemin sum sen a tihniam dawn a ni.

Energy hi renchem taka kan hman hian midangte tan malsawmna kan ni thei bawk a. Load shedding te a lo ngaihloh phah thei in midang mamawh tak tak te tan a semzai theih leh zual dawn bawk a ni. Chutiang zelin OIL (Petrol/Diesel, etc) leh Gas te pawh ren taka kan hman a tul tawh a ni tih National Energy Conservation Day-ah hian kan inchah thar leh a ni. Energy renchem hi energy siam chhuah nen a intluk a ni, tiin Secretary, Government of Mizoram; Power & Electricity Department chuan thuchhuah a siam.