1643/2022-2023
Aizawl 18th August 2022: National Agriculture Science Complex, New Delhi-ah vawiin khan National Fisheries Development Board, Governing Body 9th Annual General Meeting neih a ni a. He meeting hi Union Fisheries Minister Pu. Parshottam Rupala'n kaihruaiin Mizoram atangin Fisheries Minister Pu K. Lalrinliana a tel bawk a ni.

He meeting ah hian Pu K. Lalrinliana chuan Mizoramin luidung nungcha khawina leh humhalhna a hma a lak dan sawifiahin, tlangram cheng ten harsatna an tawh te a thlen a ni.

Pu Rintea chuan tlangrama sangha dilte chu lui tui luang nasa in a tihchhiat fo thin avangin dil siamthat a ngai fo thin tih sawiin, hei bakah hian sawrkar enkawl fish farm-te thuam that a tul tawh thu leh fish farmers ten tangkai zawka inzirnan an hman dan tur ruahmannate a thlen bawk a ni. Pu Rintea chuan Mizoram sawrkarin indigenous species (kan ram luidung/ tual to sangha) te tipung tura hmalakna a neih te leh chakai tih punnna atan experimental farm an siam dante a sawi a. Heng atan hian India ram hmundanga PMMSY scheme hnuaia tanpuina an pek chhuah anga tanpui ve turin a ngen bawk. Mizoram sawrkarin luidung nungcha humhalh nan Mizoram Fisheries Act leh Rules an siam tawh thu leh hemi hlawhtlin nan hian Mizorama NGO lian ber YMA-te nen thawhhona thuthlung an siam thu sawiin, tlawmngaia thawkte tha tihchak lehzual a nih theih nan tanpuina awm theite ngaihtuahsak turin a ngen bawk a ni.

Heng bakah hian Mizoramah ngei Fish Festival buatsaih a nih theih nan te, administrative fund leh State leh District-a programme unit -te PMMSY hnuaia siam a nih theih nan te he meetingah hian ngenna a thlen bawk a ni.