Mizoram aiawha National Games 2015 a medal dawngtute Chief Minister Pu Lal Thanhawla hoin Mizoram State Olympic Association-in (MSOA) vawiin khan Chief Minister bungalow banquet hall-ah lawmpuina leh chawimawina a buatsaih.

Chief Minister & President, MSOA chuan National Games 2015 a Mizoram tana Medal dawngtute chu chhuanawm tiin, tun aia sang leh tam medal kan la thei a ni a ti a. Thuawih theihna te, mahni inthununna te leh thawhhona tha te hi, abikin sports and games ah a pawimawh em em a ni a ti a. Sorkar-in thalaite tan kawng hrang hrangah khawvel thar a siam chhohna kal zelah infiamna hmunhma (infrastructure) chauh siam hi a tawklo tiin, hlawhtlinna hmu tur chuan a hmanrua instrument leh coach puitling dah tel te a tul a ni a ti a. Pu Hawla chuan kawng hrang hrangah Mizo te chu hmala tlai, late starter kan ni a, heti chung hian state dang te chu kan lehpel mai nilovin, state upa tawh takte pawh kan umpha tep tawh a ni a ti.

Chief Minister chuan sports lama hlawhtling tur chuan kan sawi fo thin, zuk leh hmuamah kan fihlim a ngai a, kan ei inah fimkhura, mahni inthununna thuk tak kan neih a tul a ni a ti a. Sports discipline hrang hrang a mite pawh hian a mimal emaw, association ang tein inngaihsak tawn a, inhriat tawn a pawimawh tih kan hriat a tha a ti a. Contact sports hi Mizote kalna tur tak nia a hriat thu pawh sawiin, kan tuina bik discipline ah chuan uar chhoh deuh deuh thaa a hriat thu a sawi a. Sports hi chak taka kalpui duh mah ila, sum harsatna vangin duh angin a chak theih loh a ni a ti a, kan general budget atanga kalpui mai a ni a ti a. Tunhmaa lottery atanga sum hmuhte hman thin chu tunah chuan a remchang tawhlo a ni a ti.

MSOA President, Chief Minister hian medal dawngte hnenah leh a hruaitute chungah lawmthu sawiin, footballa gold medal late hnenah citation leh jersy a hlan vek bawk a ni.

Inkhawm Chairman MSOA Sr Vice President Pu Zodintluanga, Sports Minister chuan Olympic vision 2016 tipuitling turin hmalak chhoh mek zel a ni a, kan puitlin thei ang em tih erawh tunah a swi thei loh a ni a ti a. State te ber leh mihring tlemna ber ni bawk mah ila, Chief Minister-in thalai talent tha tak tak nei kan awm a ni tih hriain, theihtawpa chakin kan kal mek a ni a ti a. Kan thil tihte hi mi thenkhatin a thim zawnga lo thlirin a thalo lai nia an hriatte an sawi chiam thin chu tha a tih loh thu sawiin, a eng lam leh kan tih that laite sawi hian min tiphur a, min fuih a, hmasawnna dik kan zawh phah thei zawk a ni a ti. Sports lamah thalaite tan infrastructure thahnem tak siam chhoh mek zel a ni tiin, National Games 2015a medal la zawng zawngte chu lawmpuiin, ‘kan chhuang tak zet che u a ni’ a ti.

National Games ah hian Indian Olympic Association pawmpui discipline te chauh telh phal a ni a. Chutiangin Mizoram aiawh tur sports discipline te hi Mizoram State Olympic Association pawmpui te chauh an tel thei a ni. National Games 2015 a Mizoram State aiawha tel thei (qualified) hi sports discipline 7, football, taekwando (hmeichhia), weightlifting, boxing, archery, table tennis leh shooting te an ni a. Mizoram tana Medal lakte hi Gold Medal Football-ah, Silver Medal 2- Taekwando leh Weightlifting leh Bronze Medal 3 -Taekwando ah te an ni a, avaiin medal 6 infiammite hian an rawn hawn a A pumpuiah State 37 telin Mizoram chu 28-na a ni pha a, medal dawng pha miahlo state 5 an awm bawk.

Kum 1987 - 2015 chhunga National Games a MSOA in Medal a dawn tawh zawng zawng chu Gold-5, Silver-9 leh Bronze-26, avaiin medal 40 discipline 8 ah a dawng tawh a ni.