Vawiin atanga ni 27 thleng awh tur, National Health Mission (NHM) hnuaia ASHA lak thar mi 104 te puala buatsaih Induction Training chu Health Directorate Conference Hall-ah tan a ni a. Dr. K.Ropari , Principal Director, H&FW Deptt. chuan Khuallian niin hun a hmanpui.

Dr.K.Ropari chuan training kalkhawmte fuihna thu sawiin India ram pumah Hriselna chungchang inhmuhkhawmna reng rengah ASHA te hming chu lam rik a nih ziah thu te, India rama IMR leh MMR tih hniamna kawnga beiseina siam tu an nih zia te a sawi a. "ASHA te hi tunah hian mahni veng leh khua-ah theuh mipui ten an chung en che u a ni tih hria u la, mipui beiseina tih thlawn sak lo ula ka duh a ni, Home Base New Born Care (Nau nei hlim enkawl zui) ngai pawimawh ula, Nau piang thihna leh nu nau chunga thihna te nasa takin a tlahniam dawn a ni. He Training atanga in zir tur, ASHA tih tur leh a pawimawhna te, Village Health Sanitation and Nutrition Day hman dan, ASHA Diary vawn fel, HBNC leh Drug-Kit hman dan te pawh uluk takin zir ngei ula, in awmna hmun theuhvah mipuite hriselna in ngai pawimawh zel dawn nia" tiin a chah a ni.

Induction Training hi Dr. Lalthantluanga, State Programme Manager, NHM in a kaihruai a. Dr.K.Lalbiakzuala, Mission Director, NHM chuan Training kalkhawmte hnenah ASHA Programme lo kalpui tawh dan leh hriattur pawimawh te a sawiin Mizoramah hian ASHA hi kum 2006 atanga kalpui tan a ni a ti a. Tunah hian Mizoram pumah ASHA 987 an awm mek thu leh 104 an dil belh mek thu te a sawi. ASHA enkawl tur bik ASHA Mobilizer mi 109 an awm mek a ni, a ti a. ASHA te tih tur leh mawhphurhna hrang hrangte tarlangin sawrkarin hamthatna a pek te a sawi lang bawk a ni.

Trainning hian Ni 27 thleng a awh a nga, State ASHA Trainers ten zirlai thupui pawimawh tak tak thlanchhuah hmangin ASHA te hi zirtirna an pe thin dawn a ni.