Mizoram Science, Technology & Innovation Council (MISTIC) leh Mizoram Mathematics Society (MMS) te huaihawtin National Mathematics Day 2019 chu Ni 20 December 2019 (Zirtawpni) khan Administrative Training Institute (ATI) Auditorium, Mizoram New Capital Complex, Khatla-ah hman a ni a, Dr. C. Vanlalramsanga, Secretary, Planning Department chuan Khuallian niin a hmanpui.

Khuallian Dr. C. Vanlalramsanga chuan thu sawiin Mizoten Mathematics kan hmelhriat dan, subject har leh zir hrehawm nia kan hriat thin chu zawi zawiin a inthlak a, nitin nuna tangkai a nihna zawnah nuam ti takin kan zir chho mek nia a hriat thu a sawi a. Zirlaiten Mathematics lama hma an sawn theih nana MISTIC leh Mizoram Mathematics Society ten hma an la thin chu lawmawm a tih thu sawiin nasa zawka hma an sawn theih nan theihtawp chhuah zel turin a sawm a ni.

Inkhawm hi Dr. R.K. Lallianthanga, Chief Scientific Officer & Member Secretary, MISTIC chuan a kaihruai a. Function-a kalte chibai bukna a neih hnuah National Mathematics Day lo pianchhuah dan leh Mizorama hman thin a nih dan te a sawi a. Science leh Mathematics chu Technology lama hmasawnna tura rahka pawimawh ber a nih vangin uar zawka zir zel turin kal khawmte a chah a ni.

National Mathematics Day pual hian Mizorama zirlai naupang class 5, 8, 10 leh 12 te tan State Level Mathematics Competition buatsaih a ni thin a. Kuminah pawh a vawi 11-na atan competition hi buatsaih leh a ni. Pu H. Vanlalhriata, Exam Co-ordinator chuan competition neih dan report a pe a. Kumin hian Class 5-ah naupang 759, Class 8-ah 698, Class 10-ah 715 leh Class 12-ah 163, an vaiin naupang 2335 in competition hi an bei a, category hrang hranga a ti tha mi 10 theuh hnenah lawmman pek a ni. Category tina lawmman pakhatna dawngtute chu:-

Class 5: PC Lalthakimi, D/o Darthuama, KD Elementary School, Aizawl
Class 8: MD Aatif Nazir, S/o MD Parwez Nazir, Mount Carmel School, Aizawl
Class 10: Simon Lalremsiama, S/o K. Shangpliang, St. Paul‘s School
Class 12: Rosangzuala Ralte, S/o Rohmingthanga, Home Missions School

Pu Lalrinpuia Tlau, Secretary, Mizoram Mathematics Society chuan Mathematics lam hawi short clip hmuhnawm tak a entir a. Pu Samuel Lalmalsawma, Senior Scientific Officer, MISTIC chuan hun khar nan vote of thanks a sawi. He hunah hian Sorkar official te bakah Mizoram Mathemtics Society member te, zirlai naupang, nu leh pa leh zirtirtute an tel a ni.

Attachment

  • Loading attachment...