Vawiin khan Mizoram Mathematics Society (MMS) chuan Pachhunga University College Seminar Hall, Aizawl-ah National Mathematics Day an hmang a, Planning Minister Pu Lalsawta chu khuallian a ni. He hunah hian State Level Mathematics Competition vawi 9-na lawmman an sem nghal a ni.
Pu Lalsawta chuan khawvel hriathlawh India Mathematician ropui Ramanujan-a piancham puala National Mathematics Day lawmna buatsaih a ni leh ta chu lawmawm a ti a, Mizoramah Mathematics in hma a sawn zel theih nana hma latute a fak. Kum rei vaklo kaltaah kha chuan Mathematics subject hi Mizoramah a tla na lo a, subject tihbaiawm takah ngaiin zirlaiten a pumpelhna zawn an tum thin tiin tunah erawh mi thahnemngai te avangin zirlaite zingah Mathematics a lo lar chho ta tial tial niin a sawi a. Mathematics competition-a lawmman latu zirlaite fakin Planning Minister chuan thahnemngai lehzual turin a fuih a, lawmman dawng ve lote pawhin a thiam ber leh tha ber an nih inhriaa hmasawn zel turin duhsakna a hlan a ni.
9th State Level Mathematics Competition hi Class V, Class VIII, Class X leh Class XII te tana buatsaih a ni a. Kumin hian Aizawl, Lunglei, Serchhip, Champhai, Saitual leh Mamit Centre-ah te zirlai naupang 3642 in an exam a. Aizawl Centre-ah zirlai 2203 ten exam beiin a tam ber an ni. Class V atangin zirlai 1026, Class VIII ah zirlai 1033, class X ah zirlai 1127 leh Class XII ah zirlai 452 te an tel a ni.
Class V-ah H.Malsawmdawngzuala, Mary Mount School, Aizawl pakhatna a ni a; Class VIII ah Vanlalruata Fanai, Radiant Heart School, Thingsulthliah; Class X ah Swagatala Lokhi Bhattacharya, Sacred Heart School, Lunglei leh Class XII ah Lalsanglura, Mt.Carmel School, Aizawl ten lawmman pakhatna an dawng a. Lawmman hi pakhatna atanga pathumna siam a nih bakah consolation prize mi pasarih zel hnenah pek an ni bawk. Lawmman pakhatna hian cheng 7000 leh certificate, pahnihna in cheng 5000 leh certificate, pathumna in cheng 3000 leh certificate, consolation prize in cheng 1000 leh certificate-te a keng tel a ni.
National Mathematics Day lawmna inkhawm hi Chief Scientific Officer Dr.R.K.Lallianthanga’n a kaihruai a. Mizo zinga Mathematics-a PhD hmasa ber Dr.L.N.Tluanga chu khual zahawm niin Mizoram Mathematics Society Secretary Dr. LP Lalduhawma’n an pawl hmalakna hrang hrang a tarlang a ni.
