461/2022-2023
Aizawl 11th May 2022: Vawiin khan Local Administration Department (LAD) buatsaihin National Panchayat Awards 2022 lawmna hun chu Aijal Club-ah neih a ni a. LAD Minister Pu K Lalrinliana chu khuallian a ni.

LAD Minister Pu K Lalrinliana chuan thingtlang khaw tin ten kawng hrang hrangah chak leh zuala hma an sawn theihna turin tualchhung inrelbawlna leh hmasawnna ngelnghet siam kawnga pawimawh em em Village Council (VC) te fuihna atan National Panchayat Awards hi Sawrkar Laipuiin a buatsaih a ni, a ti a. National Award dawng pha hial khawpa thawk tha VC te a lawmpui tak zet tih sawiin Minister chuan award dawng thei tura tan la thar theuh turin Mizoram chhunga VC zawng zawngte a chah a ni. Sawrkar laipui atanga hmasawnna hna thawhna tur sumfai lo kal te chu VC tinah sem a ni thin a, a hman dan tur a huhoa rel turin VC thenkhat chuan vantlang inkhawm Gram Sabha an kalpui tha lo thin chu pawi a tih thu Minister chuan a sawi a. Khaw mipuite lungawina zana hmasawnna hnathawhna tur sum hman dan tur Gram Sabha hmang hian sawitlang a, kalpui a nih chuan inlungrualna a thlen a, insawiselna pawh a tlem, a ti a. Vantlang rorel inkhawm Gram Sabha hi Central leh State Sawrkarin a ngai pawimawh a, dan pawhin neih ngei ngei tura a phut a nih avangin Gram Sabha hi Mizoram chhunga VC zawng zawngin an kalpui ngei ngei a ngai a ni, Pu K.Lalrinliana chuan a ti.

Ministry of Panchayati Raj chuan India ram puma Panchayat/Village Council te tan kum tin category pali ah National Panchayat Award a sem chhuak thin a. Kumin 2022 hian Mizoram atangin he award dawng thei te chu Leng, Maubuang, Thingsul Tlangnuam leh Sawleng Village Council te an ni.

Deen Dayal Upadhyay Panchayat Sashakitakaran Puraskar Award chu Leng leh Maubuang Village Council ten an dawng a, hei hian sumfai cheng nuai nga leh citation a keng tel. Leng khua hian civic services theme ah DDUPSP hi an la a, Maubuang VC hian sanitation theme ah an dawng thung.

Nanaji Deshmukh Rashtriya Gaurav Gram Sabha Puraskar award hi khawtlang leh tualchhung ei leh bar hmasawnna thlen tura tangkai taka Vantlang Rorel Inkhawm (Gram Sabha) nei tha VC te hnenah pek a ni a. Kumin hian NDRGGSP lawmman hi Leng VC ten an dawng a. Pawisa fai cheng nuai sawm leh citation a keng tel a ni.

Gram Panchayat Development Plan Award (GPDPA) chu khaw hmasawnna tura ruahmanna Village Development Plan siam tha ber hnenah pek thin niin kuminah hian Thingsul Tlangnuamin an dawng a. Pawisa fai cheng nuai 5 leh citation a keng tel.

Sawleng Village Council chuan Child-friendly Gram Panchayat Award an dawng a. Naupangte hriselna leh hmasawnna tura thawk tha hnenah he Award hi hlan a ni a. Pawisa fai cheng nuai 5 leh citation a keng tel a ni.

Ngopa RD Block chuan Best Performing Block for People’s Plan Campaign 2021 an dawng bawk a. GPDP siam tura Gram Sabha vawi engemawzat koh niin portal-a report leh data upload bakah Azadi ka Amrit Mahotsav lawmna atana kawng hrang hranga hma la tha an nih avangin Ngopa Block hnenah LAD chuan lawmman memento leh pawisa fai cheng sing hnih a hlan a ni.

Vawiin programme ah hian LAD Secretary Pu David Lalthantluanga’n thu a sawi a, LAD Director Pi Rita Lalnunmawii Pachuau chuan inlawmna thuchah sawiin LAD Joint Director Pu Lalchawimawia’n National Panchayat Awards nihphung sawifiahna hun a hmang a ni.