Rampum huapa Secondary School zirlai hmeichhia te tana chhawmdawlna sum ruahmansakna National Scheme of Incentive to Girls for Secondary Education hmanga sum pek chhuahna inkhawm chu vawiin chawhma khan Aizawl, Vanapa Hall-ah buatsaih a ni a. Parliamentary Secretary (Education) Pu Chawngtinthanga leh Vice Chairman Lunglei High Powered Committee Pu Joseph Lalhimpuia ten an hmanpui a ni.
Ram chhung hnam hnufual zawk zinga hmeichhe zirlai ten zirna tha an neih ve theihna tur leh hun laklawh laia zirna an bansan thin tihtawp nana ruahman puala vawiina inkhawm hi Education Secretary Pi Esther Lalruatkimi’n a kaihruai a. Hun hmanpuitu Pu Chawngtinthanga chuan eng sorkar pawhin a ngaihpawimawh hmasak ber thin a mipui te tana hamthatna tur hrang hrang a duan tipuitling turin dikna a pawimawh hmasaber a, chung zingah chuan zirna kawnga dikna Educational Justice chu thildang zawng aia dah hmasak tur chi a ni ang, a ti. Parliamentary Secretary chuan tunlai zirlai te vanneih tawh zia tarlangin hetianga rampum huap sum leh pai chhawmdawlna tha tak buatsaih chu chhawr tangkai ngei turin a dawngtu te a chah a. Zirtirtute pawh an hna pawimawhzia leh hmantlak a mihring chherchhuaktu an nih zia inhre nawn fo turin a fuih bawk.
Pu Joseph Lalhimpuia pawhin tunlai khawvel hi thangtharte khawvel a nih tawhzia sawichhuakin tunlaia thangtharte rilru sukthlek ang zel hian nakina kan ram dinhmun tur a hril dawn a ni a ti a, thangthar te rilru puthmang hian ram hmasawnna emaw tlukchhiatna emaw a thlen thei, a ti.
National Scheme of Incentive to Girls for Secondary Education hi Scheduled Caste, Scheduled Tribe, OBC leh hnam tlem zawk hmeichhe naupang zirna chawisan nan leh Secondary Education an zawh theih ngei nana buatsaih a nih bakah hmeichhe naupang Secondary Stage a zir mek ten sikul an bansan mai loh nana tih a ni.
Vawiin inkhawmah hian school hrang hranga zirlai hmeichhia thlanchhuah 20 te hnenah pawisa hi Parliamentary Secretary hian a sem, District tina District Education Officer ten an bial chhung theuha sem tur Pu Joseph Lalhimpuia hnen atangin an dawng thung. Cash Incentive dawng tur zirlai te hi an vaiin 4270 an ni.
