“Disaster Reduction Begins At School” tih thupui hmangin vawiin khan I&PR Auditorium ah National School Safety Programme (NSSP), Aizawl District Disaster Management Authority (ADDMA) buatsaih a hman a ni a, Education Minister Pu Lalsawta’n a hmanpui.
He inkhawm Dr. Lalngura Tlau, Asst. Commissioner, Aizawl District kaihruaiah hian Pu Lalsawta chuan chhiatna lo thlen hun tur tuman hre lawk thei lo mah ila inpuahchahna awmze nei tak neih a ngai a ni, a ti a. “Disaster Reduction Begins At School” tih theme hman a ni chu lawmawm a tih thu sawiin, School a kal zirlai naupang te hi kan ram nghahfak an nih avangin anmahni atanga zirtirna bultan hi a tha in a tul tak zet a ni, a ti a. Zirtirtute chu tih tak zeta zirtirna pe tur a chahin, “zirtirtuten tih tak zeta in zirtir chuan he programme hi a hlawhtling ang”, a ti. Disaster Management, Relief & Rehabiliatation Department lam pawh tang lehzual tur a chahin, chhiatrupna thlen huna tih leh tih loh tur leh chhiatna laka kan inven theih dan in hrilhriatna uar lehzual turin a chah a. Chhiatna hi kan chunga thleng thei reng ani tih hria a, inralring a, kan insak dan te, kan tuichhe paih dan te leh kawng dang dangah fimkhur leh hmathlir thui tak nei chunga chet la thin turin kalkhawm te a chah bawk. He hunah hian Pu Lalsawta chuan school 15 hnenah Megaphone a sem nghal a, tangkai taka hman ngei anih a beisei thu Minister chuan a sawi.
School tam zawk hi hmun remlo leh hmun chep tak tak a awm a nih avangin, chhiatna leh vanduaina rapthlak lakah naupang te an himlo zual em em a, naupangte him theih nan NSSP hi siam a ni a. NSSP-in a tum ber chu School naupang te vanduaina rapthlak alo thlen thulh a lo hmachhawn thei tura naupangte buatsaih leh inrinlawkna nunphung neih tir a ni. He Prohramme hnuaiah hian school 250 thlan a ni a, Aizawl District a school thlan bik hrang hrangah zirtirna an pe tawh bawk. He Programme hnuaiah hian mi 650 hnenah zirtirna pek tum a ni a, chung mite chu School Zirtirtute, Local Council leh Village Council aiawh te an ni.
He inkhawmnaah hian Pi Pinky Zosangpuii, Asst. Commissioner chuan NSSP kalpui a nih dan te sawiin, Pi Irene Lalmuanzovi, DPC, NSSP in mock drill neih dan tur zirtirna a pe a. Mock Drill video te enho niin, zawhna leh chhanna hun siam a ni bawk.
