Vawiin khan Serchhip DC Conference Hall-ah National School Safety Programme (NSSP) kaltlanga Serchhip District chhunga Zirna In 150 thlanchhuah te tan “Basic First-Aid Training” neih a ni a, First-Aid Kit sem nghal a ni bawk.

Serchhip District Bawrhsap Pi Juhi Mukherjee, IAS pawhin vawiin hun hi hmanpuiin School hrang hrang aiawh zirtirtu kalkhawmte hmaah fuihna thu sawiin, an thil zir chu an tan leh an zirlaite tan mai bakah School leh khawtlang tan malsawmna a chanter tum ngei turin a chah a, First-Aid Kit an dawn chu “basic minimum needs” ni mahse an thil dawn tea tang khan mamawh leh tih belh ngaite an hriat belh zel dawn a ni a ti a, an rilru leh ngaihtuahna te ataka seng zui turin a chah bawk. Bawrhsap chuan Mizo Zirlaite chu thuawih thei tak an ni tih a mit ngeia a hmuh thu sawiin zirtirtute chu an zirlaite uluk taka an kaihhruai phawt chuan chhawr tlak tak tak an ni ngei dawn ani tih hre reng turin a chah bawk a ni. Bawrhsap hian thu a sawi zawh hian NSSP hnuaia school hrang hrangte hman tur “First-Aid Kit” a sem nghal a ni.

Vawiin hun hi Pi B. Malsawmtluangi, Nodal Officer, DM&R in a kaihruai a, Pu Zothansanga Hmar, Master Trainer, DM&R hnen atangin First-Aid inzirtirna “Basic First-Aid Training” dawn a ni a, Pi Zotinkimi, District Project Coordinator, NSSP, Serchhip District in lawmthu sawiin hnu a khar a ni.

National School Safety Programme hi kum 2012 atanga kalpui niin Pilot Project atan Serchhip District leh Aizawl District thlan a ni a, kum 2014 June thla thleng tura ruahman anih hnu ah kum khat dang pawh sei leh niin kumin June thla hian a tawp ang. NSSP hnuaia School thlanchhuah te hi chhiatrupna laka inven leh hmachhawn dan chi hrang hrang zirtirna pek niin School Disaster Management Plan siam tir vek an nih bakah hmanraw chi hrang hrang pek an ni bawk a ni.