No.7673/2020-2021

Vawiin khan Mizoram Science, Technology & Innovation Council, Directorate of Science & Technology buatsaih ‘National Science Day’ hmanna-ah Home Minister Pu Lalchamliana chu khuallian a ni a. He lawmna program hi Synod Conference Centre, Aizawl-ah neih a ni. 

Minister Pu Lalchamliana chuan Indian Scientist, Physics lama mithiam Dr. C.V. Raman’an Raman Effect a lo hmuhchhuah denchhena National Science Day hman a ni thei chu lawmawm a ti a. India ram state naupang ber te zinga mi Mizoramah pawh Science & Technology lama hmasawnna hmuh theih a a awm chho zel chu lawmawm a tih thu sawiin, tunhnaiah sawrkar pawhin Science & Technology Department kaltlangin Ailawng khuaah Eco-tourism leh Environment Conservation Project kalpui a ni a, Aizawlah Mizo pa tualchher thilsiam thiam te tan a chhenfakawm tur tak Innovation Facility Centre hawn a lo ni ta bawk a ni, a ti a. Berawtlanga Mizoram Science Centre-ah Digital Planetarium te, zirlai ten science zir an tui theihna tura inzirna Innovation Hub-te din a ni a. Heng bakah hian Lunglei lamah Lunglei Science Centre leh Digital Planetarium te sak mek a ni bawk a; Science & Technology hnuaiah hian Centre leh Cell hrang hrang ten an hmazawn a thawh tur chi hrang hrang an thawk bawk a ni, a ti a. Minister chuan State Climate Change Cell-in sik leh sa zirchianna lam a buaipui a, State Meteorological Centre-in nitin sik leh sa dinhmun te mipuite hnenah min hriattir reng bawk a, Patent Information Centre-in Intellectual Property Rights chi hrang hrang, heng Patent, Copyright, Design, Geographical Indication, Trade Mark leh a dang te hi an buaipui thin a, tunhnai lawk pawh khan Art & Culture Department te nen tang kawpin Mizo Puan panga – Mizo Puanchei, Tawlhlohpuan, Hmaram, Ngotekherh leh Pawndum te chu Geographical Indication registration an ti fel a, Khawvel huap pawhin heng puante hi Mizote ta a ni tih nemnghehin a awm tawh a ni, a ti a.  Science hi hmasawnna bul a nih avangin hetia hma kan sawn viau lai hian tan lakna tur hi a la tam khawp a, kumina National Science Day thupui “Future of Science, Technology & Innovation : Impacts on Education, Skills and Work”  hi a pawimawh hle a, kan thalaite tana eizawnna siam kawngah te, industry leh entrepreneurship lama hmasawnna kawngah te, ei leh bar hnianghnar zawk kan neih theihna tur te, kawng tha leh tlo zawk kan neih theih nan te, thil hrang hrangah hmasawnna tur a la tam hle a ni, a ti a

Pu H. Lalsawmliana, Chief Scientific Officer & Member Secretary, MISTIC chuan he hun hi kaihruaiin, National Science Day (NSD) report tawi Pu Samuel Lalmalsawma, Senior Scientific Officer in powerpoint presentation hmangin a pe a, NSD Theme sawifiahna leh Science & Technology pawimawhna leh hmasawnna hrang hrang bakah Raman Effect inhrilhfiahna Pu P.C. Lalngilneia, Scientific Officer, MISTIC in a nei nghal bawk a. NSD denchhena State Level Science Quiz Award 2021 semna neih nghal bawk a. Pu K.Lalrammuana, Senior Scientific Officer in lawmthu sawiin he hun hi a khar a ni. 

National Science Day hi February ni 28 kha a ni a, chawlhni a nih avangin vawiin hian hman a ni.